Gallagher-a'n Spurs zawm dawn

Tottenham Hotspur chuan Atletico Madrid aṭanga Connor Gallagher lei chhuak turin an inrem tawh niin journalist rintlak Fabrizio Romano chuan social media kaltlangin a tarlang.

Gallagher hi Aston Villa-in loan a lak tum ve bawkin inchuh deuh mah se pound maktaduai 35-in Spurs hian an chang ta zawk. Chelsea midfielder hlui Gallagher hian medical test nei turin London a pan tawh niin chanchinbu ṭhenkhat chuan an sawi a, mimal thilah inremna an la nei lo thung.

Kum 25 mi Gallagher hian 2024 khan Chelsea aṭanga Atletico zawmin thla 18 a awm hman a, a luh tirhah beiseina sang tak nei mah se a duh angin inkhelhna hmun a chang tam lo. Gallagher hian World Cup lo awm turah an ram tan inlan a duh avangin a khelh tam theihna tur team zawngin Spurs a zawm dawn ta a ni. Gallagher hi England coach Thomas Tuchel-a kaihhruaina hnuaiah vawi khat a inlan ve tawh a, nikum June-a Senegal nen friendly match an khelh khan minute 59 chhung a khel.

English club hrang hrangah Gallagher hi a khel kual hnem tawh a, Chelsea bakah Charlton, Swansea, West Brom leh Crystal Palace-ah te khel tawhin an ram league-ah a mikhual lo a, England tan vawi 22 inlanin goal khat a khung tawh bawk.

Spurs hi tun hnaiah hliamin a tibuai a, Mohamed Kudus a inhliam bakah Rodrigo Bentancur chu a inhliam belh a, Bentancur hi zai a ngaih avangin thla hnih chhung chawl tura ngaih niin, Gallagher hi Spurs in an mamawh lai tak a ni.