Barcelona-ah Cancelo a kir

Portuguese defender Joao Cancelo chuan loan-a a lo khelh tawhna Barcelona-ah loan bawkin Saudi Pro League club Al-Hilal aṭangin a zawm a, Catalan club-ah hian season tawp thleng a khel ang.

Kum 31 mi Cancelo hian 2024 khan Barcelona-ah loan thoin thla ruk chhung a lo khel tawh a, match 42 inlanin goal li khungin assist vawi nga a nei hman. Barcelona a zawm hma hian loan thoin German club lian Bayern Munich tan a khel tawh bawk. Catalan club hian Andreas Christensen inhliam vanga hmunruak hnawhkhat nan Cancelo hi an hmang dawn a, player ziahluh kawngah harsatna a nei lo ang.

Cancelo chuan ,"He hmunah hian Barca tana nomawi tam thei ang ber chawipui tumin ka lo let a, kan teammate-te pawhin min lo dawngsawng ṭha a, he hmun hi ka tan chuan ka in ang mai a ni," tiin Barca chu nuam a tih thu a sawi.

Manchester City defender hlui hi Europe club lian hrang hrang tan a khel kual hnem tawh a, Pep Guardiola hnuaiah hlawhtling taka khelin nomawi tam tak a chawi hman a, chona thar a hmachhawn duh avangin Barca aṭanga City-a a let hnuah pound mtd 21.2-in Al-Hilal zawm lehin Saudi Arabia lamah a insuan. Saudi Pro League-ah Al-Hilal tan player pawimawh a ni lehnghal.

Barca hian zanin dar 1:30-ah Racing de Santander nen Copa Del Rey-ah an inhmachhawn dawn a, Cancelo inlan a la rinawm loh. Pathianni zana Real Sociedad an tum hunah erawh squad-ah a awm hman tura ngaih a ni.