Gabon sorkarin Auba hremna an hlip

AFCON-a an chet chhiat em avanga an ram sorkarin a hrem, Gabon national team leh an striker chhuanvawr Pierre-Emerick Aubameyang te hremna chu Gabon sorkar chuan a hlip leh ta.

Gabon hi AFCON-ah group stage paltlang zo loin, group F-ah a mawngphah an ni a, khatihlaia an ram sports minister Simplice-Desire Mamboula chuan, "Zahpuiawm" tia sawiin, an national team chu suspend an nih thu a sawi a, Auba leh captain Bruno Ecuele Manga chu ram tana an inlan theih tawh loh tur thu a puang bawk!

Hei mai a ni lo - coach Thierry Mouyouma an ban bawk! Mahse, Gabon sports minister thar Paul Ulrich Kessany chuan he hremna zawng zawng hi a hlip a, Gabon rama football thuneitu sang FEGAFOOT chuan an tan thu lawmawm a nih thu an sawi.

FEGAFOOT chuan, "Kan thil tawn lawmawm lo tak aṭanga thu lawmawm hriat tur a awm leh ta hi lawmawm tak a ni," an ti a, an coach ban tak Mouyouma thlaktu tur zawn kawnga titi puiah an ram Sports Minister thar chuan a sawm thu an sawi bawk - Gabon-in Sports Minister thar an neih chhan hi Minister-te chanvo siksawi a nih vang a ni.

FIFA chuan football inrelbawlnaa sorkar inrawlh hi a rem ti lo bur a, Gabon Sports Minister thar hian an ram team leh player-te hremna hi hlip lo se chuan FIFA hrem hmabak an ni.