Mizoram tel lohna Santosh Trophy final round

79th National Football Championship for Santosh Trophy 2025-26 Final Round chu January 21, Nilaini aṭangin Dhakuakhana leh Silapathar, Assam-ah khelh a ni dawn. Team 12 chauh an dam tawh a, Mizoram an tel ve tawh lo. Inelna thlengtu Assam bakah nikum finalist West Bengal leh Kerala ten final round an lut nghal a, team dang pakuain group stage hmangin final round an inpettling.

Group A-ah inelna thlengtu Assam leh champion lai West Bengal bakah Tamil Nadu, Uttarakhand, Nagaland leh Rajasthan te an awm a, group B-ah Kerala, Services, Punjab, Odisha, Railways leh Meghalaya te an awm thung. Group tin aṭangni a sang pali ve veiin knockout stage an lut dawn a, quarterfinal hi February 2-3, 2026-ah khelh a ni dawn. Semifinal hi February 5, Ningania khelh tur niin final hi February 8, Pathiannia khelh tur a ni thung.

Tel lo langsar

Mizoram hian 2023-24 season-ah coach Lalsangzuala Hmar hoin final round an luh bakah semifinal hial an thleng a, kum 2014 champion hi final round-a tel lo langsar zingah an tel. Manipur pawh final round khel turin an inpetling zo lo a, NorthEast aṭanga champion tawh pahnih awm lo tur hi inelna tan pawh a ṭha lo.

2023-24 season-a finalist Goa pawh Services nen group khatah an awm a, final round an khel dawn lo. Tun hnai inelna che ṭha ṭhin Delhi pawh Railways nen group khatah an awm a, a ṭha 12 zingah an tel pha lo. Assam-in inelna an thlen avangin NorthEast aṭangin team thum an tel dawn a, Mizoram leh Manipur tel phak lohnaah Nagaland leh Meghalaya te an tel ang.