Tu zawkin nge final lut dawn?

Mizoram Premier League Season 8 semifinal second leg chu zanin hian RG Stadium-ah Electric Veng FC leh Chhinga Veng FC ten an khel dawn. First leg-ah goal a lut lo a, team pahnih hi final lut turin an dinhmun ṭhat dan a inang chiah.

Electric Veng leh Chhinga Vengin nomawi an duh a nih chuan zaninah si ruk laa an thawhchhuah a ngai a, veng mipuiin an thlawp ṭhat a pawimawh ang.

Chhinga Vengin an midfield pawimawh KC Larchhuakmawia hliam vangin an chhawr thei dawn lo a, Electric Veng lamah forward David Lalchhuanawma leh midfielder Fela Zote te dinhmun a chiang lo bawk. Chhingcows coach Anand Gurung chuan KC-a vanga an buai loh tur thu a sawi a, Electric Veng lama inhliamte pawh minute 90 an chhawr thei lo a nih pawhin hman theih tura an insiam ngei a rinawm.

Electric Veng coach Lalsangzuala Hmar-in season hnih chhung Chhinga Veng a enkawl a, tuna Chhingcows coach pahnih Anand Gurung leh Lalremruata te nen hian an thawkho. Team pahnih hi an khelh dan hmang a inang a, an inhriatchian bawk avangin first leg-ah an fimkhur ve ve. Minute 90 chhung hian goal a lut lo a ni ringawt lo a, a hmuhnawm tawk lo bawk.

Zaninah erawh chak an awm ngei a ṭul tawh a, goal a lut lo a nih pawhin penalty shootout hmanga chak zawk zawn tur a nih avangin hmuhnawm thlir tur a awm tawh dawn. EFC coach Sanga chuan, "A tir aṭanga pawngpaw nawr kan tum lo a, game plan chi thum kan nei a. Kan khingpuite khelh dan milin kan khel ang a, goal khung erawh kan tum khawp," tiin penalty thlen loh an tum thu a sawi.

Chhinga Veng coach Anand Gurung pawhin, "First leg-ah kha chuan kan hlauthawng a, kan fimkhur. Tunah erawh goal venhim tum ringawt chuan kan khel dawn lo a, chak tumin kan khel dawn," tiin attacking football an khelh tur thu a sawi.

Chhinga Vengin first leg-ah Ivorian forward Ouattara Sie bench-ah an dah thei a, goal 11 khung tawh MC Malsawmzuala an kawl tho avangin thutlukna mak a ni hran lo. Tun ṭumah erawh KC-a inhliam vangin Ouattara Sie a inlan ngei a rinawm.

Chhingcows hi Aizawl FC leh Mizoram Police tih loha goal khung tam ber an ni a, chutihrualin an goal khung zinga 46% hi MC-a khung a nih avangin Siaha tlangval thlawp turin Lalchungnunga, Lalsawmzela, Malsawmdawnga leh Ṭhasiama te an pawimawh ang.

Electric Vengin hmatawngah Lalrammawia an rawn dah a, David-a dam chian loh avangin Rammawia hna a pawimawh dawn. Lammual aia RG Stadium a zau avangin Jacob Lalrawngbawla a pawimawh dawn a, Shillong Lajong midfielder hlui hian a ball pet thiamna leh rem hriatna hmanga game a kaihhruai ṭhat a ṭul dawn.

EFC hian player hmuhnawm Ramhlunchhunga leh hmabak nei êng Vanlallawmtluanga te an kawl a, Chhinga Veng tlarhnung khawng ṭha tak pawh an fimkhur viau a ṭul ang.

Hun pangngaia an inhnehtawk a nih chuan penalty hmanga chak zawk zawn a ṭul dawn a, rin thiam a harsa ta hle. MPL7 final-ah Chhinga Vengin penalty shootout hmangin Aizawl FC an hneh lo a, tihsual nawn an tum lo.

Chhingcows coach Anand Gurung chuan, "Penalty hi a thleng thei tih kan chiang a, kan zir uluk hle," tiin a sawi a, anni hi kumin MPL-a state pawn keeper nei awmchhun niin Dharmindar Guru an ringtawk khawp ang.

Electric Vengin keeper pahnih MS Dawngliana leh Lalmuansanga te an kawl a, coach Sanga'n bul ṭan tur zawk a la hriat loh thu Vanglaini a hrilh. Sanga chuan, "Chhinga Veng ka enkawl lai khan kan zir nasat ber penalty-ah kan chak lo. Chutihrualin penalty hi final kalkawnga awm thei a nih avangin kan zir tho a, kan vanneih ṭum a inherchhuah ngei ka beisei," tiin a sawi.