Sanchez tihsualah mawh ka phur - Rosenior

Chelsea-in manager thar Liam Rosenior hnuaia Stamford Bridge-a an khelh hmasak berah Arsenal 3-2 in an hneh lo a, goal thum chhuahin goalkeeper Robert Sanchez tihsual vangin goal hmasa pahnih a lut.

Blues manager Rosenior chuan, "Robert Sanchez tihsual chauh ni loin Arsenal khan team goal ṭha tak an khung. Inkhelh hmain ṭum danga a tih ṭhin loh anga ti turin ka hrilh a, chubakah player an chetsual chuan mawh ka phur ang tih chiang takin ka sawi. Ka mawhphurhna a ni," tiin a sawi.

Sanchez fak zuiin Rosenior chuan, "Second half-a Sanchez-a dan kha chu world class a ni a, goal ngat se chuan kan beiseina a bo thei hial ang. Ka hnuaiah vawi khat a khelhna chauh a ni a, kan inhrechiang chho zel dawn. Duh dan ka nei a, ka player-ten ka duh danin an khel tur a ni a, an tisual a nih chuan mawh ka phur zel dawn," tiin player chhan a pe na hle.

Mahni mualah Chelsea tlawm mah se an chak loh chhanah chhuanlam tur an nei thung. Fitness test paltlang loh vangin Cole Palmer, Reece James leh Malo Gusto te an tel thei lo a, Moises Caicedo-a'n hrem a tawk a, damlohna vangin Liam Delap leh Jamie Gittens te an tel thei lo bawk.

Rosenior chuan, "Palmer-a'n a malpuiah hliam tenau a nei a, a khel lui a nih chuan kar ruk hial a chawlh a ṭul thei. Player ṭha tak a nih avangin kar ruk chhung chân ka phal lo. James pawh an intauh avangin a inlan thei lo a, kartawpah erawh kan hmu thei ang. Team ṭha tak lakah kim loin kan khel a, heti chunga ṭha taka kan khelh avangin ka naute ka chhuang hle," tiin a sawi.

Chelsea hian January 17, Inrinni hian Brentford an mikhual dawn a, Arsenal an hmachhawn leh hmain Pafos, Crystal Palace, Napoli leh West Ham te an hmachhawn bawk ang.