Bundesliga hmahruaitu Bayern an sang zel

Bayern Munich chuan Nilaini zan khan an mikhualna ramah FC Cologne chu 3-1 in an hneh a, table-ah pakhatna dinhmun an sawhnghet zel. Cologne hian Linton Maina hmangin khung hmasa mah se Bavarians-in Serge Gnabry, Kim Min-jae leh Lennart Karl te goal hmangin an lehthal.

Rhein Energie Stadion-ah ṭan aṭangin Bayern an chungung zawk a, chance hlauhawm an nei nghal nual. Goal khung thei lo mah se Cologne keeper Marvin Schwäbe tan hna an siamsak hnem hle.

Bavarians-in inkhel thunun mah se an chesual vangin minute 41-naah goal an chhuah. Linton Maina-a'n Serge Gnabry ball a chhuhsak hnuah anmahni halfway line aṭanga ball khalh ṭanin Bayern penalty box pawn hret aṭangin goal-ah kawh takin a pet a, veteran keeper Manuel Neuer-a'n a dang zo lo. Solo goal ropui a ni.

Halftime hmain Bayern-in siphurh an sut a, Serge Gnabry chuan a tihsual siam ṭhat nan hun pek belh minute nganaah Michael Olise ball cross chu mawi takin keeper a pet sawh khum a, 1-1 in halftime a tawp.

Second half-ah Cologne-in chance nei hmasa mah se goal hmaah an hriam tawk lo. A chungnung zawkah Bayern an ṭang chhunzawm a, minute 71-naah Luiz Diaz ball vawrh luh chu a out dawna a lan hnuah Japanese defender Hiroki Ito-a'n rawn tauh letin Korean defender Kim Min Jae chuan hnai tak aṭangin an hmahruaina goal a tauh lut.

Minute 84-naah Luiz Diaz chuan Cologne defender pali a bum hnuah Lennart Karl tan pein German rawlthar duhawm hian cool takin goal kilah a pet lut a, an hmahruaina a belhchhah. Goal dang luh belh tawh loin hun a tawp zui a, 3-1 in Bayern an chak.

Inkhel dangah Bayern hnaih bertu Borussia Dortmund chuan Nico Schlotterbeck, Marcel Sabitzer leh Serhou Guirassy te goal hmangin an mikhual Werder Bremen chu 3-0 in an hneh a, table-ah pahnihnaah awmin hmahruaitu Bayern nen point 11-in an inthlau mek.