Carrick hnuaiah United-in training an ṭan

Manchester United-in Michael Carrick hnuaiah Nilaini aṭang khan training an ṭan a, AFCON khela zin chhuak Bryan Mbeumo leh Amad Diallo ten training an zawm tawh. Inelna thlengtu Morocco-in Nigeria hneha final an luh avangin Noussair Mazraoui erawh an la chhawr chhunzawm thei lo ang.

Carrick-a enkawl Man United hian January 17, Inrinni tlai dar 6:00 hian an hmelma Manchester City an mikhual dawn. Nikum September thla khan Ruben Amorim-a kaihhruaina hnuaiah Pep Guardiola hoten United hi 3-0 in an sawp a, Erling Haaland-a'n goal hnih a khung bakah Phil Foden-a'n goal khat a khung bawk.

Man United manager lailawk Carrick hi Chelsea leh England assistant manager hlui Steve Holland bakah Jonathan Woodgate, Jonny Evans leh Travis Binnion ten an pui dawn.

English manager hian Middlesbrough kha match 136 enkawlin formation paruk a hmang a, match 120-ah 4-2-3-1 formation match sarih hmangin 3-5-2, 4-3-3, 3-4-3 leh 4-4-1-1 hman ṭum a nei bawk. Amorim-a hnuaiah defender pathum an hmang a, Carrick-a hnuaiah defender pali an hmang turah a ngaih theih.