ISL club-te AFC-ah inlan thei dawn

All India Football Federation-in Asia khawmualpuia football thuneitu sang ber, Asian Football Confederation hnena lehkha a thawn chu AFC chuan a chhang let a, ISL-ah match tlem dawn mah se, Indian club-ten AFC hnuai inelna an hmachhawn thei dawn.

Mahse, Indian club-te tana AFC Champions League 2 direct-a slot awm chu, indirect-in an chang dawn thung. AFC danah chuan an hnuaia inelna hmachhawn turin club-te chuan season khatah match 24 tal an khelh a ngai.

Tun season-ah erawh ISL khelh lawk theih a ni lo a, February 14-a khelh ṭan tura ruahmanna siam niin, May-ah khelh zawh tura ruahmanna siam a ni. ISL khelh hun chhung a rei dawn lo a, club tinin match 13 bak an khel dawn lo.

Super Cup nena chhiar tel pawhin match 16 vel bak season khatah an khel lo tihna a ni a, match mamawh zat 24 chu an la hlat hret - hei vang hian Champions League 2-a direct slot ṭhin chu indirect-a pek an ni dawn.

Season hmasa khan ISL league winner shield latu chuan Champions League 2 hi direct-in an khel a, Super Cup champion-in qualifier aṭangin bul an ṭan thung.

Tun season-ah Super Cup khelh hma niin, FC Goa an champion tawh a, Goan club bakah hian ISL league winner-te chuan qualifier hi an khel ve leh bawk ang.

ISL-ah hian league round-a hmahruaitu chu league winner tih niin, knockout champion chu ISL Cup champion tih an ni thung. AFC danah league table-a point hmu sang ber chu champion an nih avangin ISL Cup latu ni loin, league winner shield dawngtu zawkin khawmualpui inelna an hmachhawn ṭhin.

Asia-ah hian AFC Champions League chu inelna sang ber niin, AFC Champions League 2 hi pahnihna a ni a, a tawi zawnga sawi chuan Europe-a an khelh ṭhin Europa League tlukpui inelna tihna a ni.