Serie A hmahruaitu Inter an chak

Nilaini zan Serie A inkhelah table hmahruaitu Inter Milan chuan an mikhual Leece chu Italian rawlthar Pio Esposito goal hmangin 1-0 in an hneh. Inter hian hma an hruai chhunzawma, an hmelma AC Milan nen an inthlauhna chu point rukin an tizau.

San Siro-a inkhelah mualneitu Inter an hlauhawm nghal a, Ange Yoan Bonny chuan minute rukna lekah chance nei nghalin goal erawh a khung thei lo. Minute 24-naah Bonny bawkin penalty a hlawchhuak a, VAR en hnuah sut leh a ni thung a, French forward Bonny a nung hle.

Mikhual team Leece-in chance nei ve zeuh ṭhin mah se Inter keeper Yann Sommer tan hna hautak an siamsak thei lo. Inter-in game an thunun a, goal hmu turin kan nghah rei a ngai thung. Minute 78-naah Italian rawlthar Pio Esposito chuan Lautaro Martinez shot per let chu hnai tak aṭangin goal awmchhun ni turin a khung a, Inter chak nan a tawk.

Nizan khan AC Milan-in Cesc Fabregas-a kaihhruai Como an hmachhawn a, result a zirin hmahruaitu Inter Milan nena an inthlauhna a danglam thei ang. Inkhel dangah Napoli leh an mikhual Parma goal awm loin an inhnehtawk. Napoli hian pahnihnaa awm theihna hun ṭha an bawlhpelh a, Juventus lehpelin pathumnaah an chho thung.