Churchill-in Bagan an sawp

Mohun Bagan coach Jose Vicuna-a'n an mualah ṭha zawka an khelh tur thu sawi mah se Pathianni zan khan Kalyani Municipality Stadium-ah Churchill Brothers-in 4-2 in an sawp.

Churchill tan Kelkang tlangval Lalkhaw-puimawia'n bul a ṭan a, Goan club tan hian Willis Plaza-a'n minute hnihna lekah a khung nghal. Mikhual team tan Robert Primus-a'n minute 29-naah a khung belh leh bawk.

Bagan beiseina siam turin Francisco Munoz chuan minute 33-naah penalty aṭangin siphurh a sut ṭhen a, amaherawhchu Willis Plaza-a'n minute 36-naah Churchill goal thumna khungin Radanfah Abu Bakr-a'n minute 76-naah chak ngemnghehna goal a khung.

Kolkata club substitute Subha Ghosh-a'n mualpho lutuk tur hliahkhuh nan minute 90-naah a khung. Mohun Bagan hian Spanish player pali leh Trinidad and Tobago player pakhat nen bul an ṭan mah se Churchill tana Trinidad and Tobago player pathum an langsar zawk. Goan club goal li hi Trinidad and Tobago player khung vek a ni.

Vawiin hian I League match hnih a awm dawn. Chawhnu dar 2:00-ah Neroca leh East Bengal an inkhel ang a, hemi hun vek hian Punjab leh Chennai City te an inkhel bawk ang.