Richarlison chawl rei dawn

Tottenham Hotspur fan-te midfielder thar Conor Gallagher an lakluh avangin an lawm a, mahse, an hlim au thawm pawh a reh fel hmain chanchin lawmawm loin a deng zui - an forward Richarlison chu malpui hliam vangin kar sarih vel a chawlh a ngai dawn.

Kum 2022-a Everton aṭanga Spurs zawmtu Richarlison hi tun season-ah Spurs tan top scorer a ni mek a, match 31-ah goal riat a khung. Premier League bikah match 21 khelh tawhah goal sarih a khung a, assist vawi thum a nei - a ropui tawk lo.

Spurs hian tun season-ah beisei an phak lo hrim hrim a, inelna hrang hranga an match hnuhnung pasarihah vawi khat chiah an chak! An match hnuhnung berah FA Cup khelin, Aston Villa chuan an pet thla leh diam tawh bawk - he inkhelah hian Richarlison hi a inhliam a, kar sarih a chawlh a ngai dawn ta.

Zanin dar 8:30-ah Spurs hian league match khel turin West Ham an mikhual dawn a, Hammers hi anmahni ang thoa beisei phak lo niin, Premier League table-ah 18-na an ni mek.

Hei vang hian zanin inkhela chak loh hi Spurs tan a mualpho thlak lehzual dawn a, an manganna belhchhah turin Richarlison a inhliam bawk si! Hetihrual hian London club hian lawmna tur erawh an nei ve tho.

Midfielder pahnih Lucas Bergvall leh Yves Bissouma te chu hliam vanga an chawlh hnuah chhawr theihin an lo kir leh tawh a, fullback Destiny Udogie leh striker Dominic Solanke pawh kir thei dinhmunah an ding - goal khung tur mamawh lai taka Solanke lo kir tur hi Spurs tan thawm rimawi a tling ang.

Spurs boss Thomas Frank-a'n, "Kan mamawh tak a ni," tia a sawi, tun hnaia an lakluh Gallagher pawh Danish manager hian a duh chuan a chhawr nghal thei dawn bawk a, player inhliam lo kir nen zaninah Spurs 'thar zawk' hmuh beisei a sual lo.

Hetihlai hian Ajax coach ban hlim, Everton defender hlui John Heitinga chuan assistant coach ni turin Spurs hi a zawm bawk a, London club-in insiamṭhat hna an thawk mek.