Robertson-a hma hun a chiang lo

Liverpool left back Andy Robertson chuan Anfield-a a hma hun a chian loh thu a sawi chhuak a, season tawp ruala contract hmang zo tawh tur a nih avangin a chhuahna chance a sang hle.

Reds chuan an Vice Captain hi contract thar chungchangah indawrna chu an neihpui tawh a, mahse, a bul ṭanna chauh la ni rihin, an inremna tur atana an duhdan engkim chiang taka tarlan a la awm lo.

Robertson chuan, "Inbiakna kan nei ngei a, mahse, puanchhuah erawh a ṭul rih lo - thil thlen dan chu kan hre zel ang. Thla nga hun ka la nei a, kan tana ṭha tur zawk kan ngaihtuah a ngai.

"Ka chhungte nen pawh kan sawi ho ang a, thutlukna kan siam ang," a ti. Robertson chuan sawi zawmin, "Tunah chuan hahdam taka hun hman a, Liverpool player ka ni ve thei hi lawm taka hun hman ka tum a ni mai.

"World Cup khelh ka châk em em a, kan inpetkai ta bawk. Kei leh ka chhungten enge kan duh ber kan ngaihtuah a ngai," a ti a, thutlukna siam tura hun a la duh thu a sawi.

Liverpool-in pound maktaduai 40-a Milos Kerkez an lei hnuah Robertson hian Reds-ah hmun a chang ta meuh lo. Scottish fullback hian league match liah bul a ṭan laiin, Kerkez hian match 11-ah bul a ṭan thung.

Hetihrual hian Liverpool tan inelna hrang hrangah match 20 a khel tling tawh a, Reds-a hmun chang tawh lo hulhual chu a ni lo.

Scotland captain chuan, "Reds tana ka hun hman hnuhnung, kum riat leh a chanve liam ta kha thlir ila, Jurgen Klopp-a'n vawi khat chu bench-ah min dah a, ka lungawi lo hle.

"Inkhelh reng duh ṭhin player ka ni a, hliam nei chung pawhin ka inkhel ṭhin. 50,40,30% pawh ni se, club leh ram tan ka khel fo. Khelmuala awm reng duh ka ni a, tunah chuan a theih ta lo a, chuvang chuan thil hi a danglam ve ta," a ti a, chhuah a hreh lo.

Robertson chuan, "Tun season-a ka chanvo hi a danglam ta hret a, footballer tu pawh, bench-ah an ṭhu a, an hlim reng tho a nih chuan club tana khelh an phu lo a ni," a ti a, bench-a awm reng chu nuam a tih loh thu a sawi.

Kum 31 mi defender chuan Liverpool fak zuiin, "Liverpool tan ka theihna zawng zawng ka hlan a, anni pawhin min duhsak hle. Ka khelh ṭhat lai chuan contract mawm tak tak hmangin min duhsakna pawh an lantir ṭhin.

"Club thuneitute nena kan inkar a ṭha reng a, Hull City aṭanga £8mtd leka lei hnathawh atan chuan ka thawk ṭha ve bawk a lawm!" a ti - Robertson hian Liverpool tan nomawi chawi theih zawng zawng a chawi kim.

Liverpool hian tun season-ah erawh beisei an phak lo a, an talbuai hle. Zanin dar 8:30 hian league match khel turin Burnley an mikhual dawn a, an league match hnuhnung pathumah an khingpui an draw vek avangin fan-ten result ṭha zawk an beisei ang.