Number 1 bik ka nei lo - Rosenior

Chelsea coach thar Liam Rosenior chuan a team-ah number 1 bik an awm loh thu sawiin, player tin chuan hmun chang phak tura an beih ṭheuh a ngaih thu a sawi.

Strasbourg aṭanga Chelsea pantu Rosenior hian January 8 khan Blues hi a zawm a, Enzo Maresca a thlak - Chelsea hi match hnih kaihruai tawhin, a match hmasa zawkah Charlton Athletic chu nuamsain hneh mah se, League Cup semifinal-ah Arsenal an ngam lo.

Blues hian League Cup semifinal first leg-ah Arsenal hi 3-2 in an ngam lo a, an goal chhuah pahnih chu keeper Robert Sanchez-a tihsual vanga lut a ni. Rosenior hian inkhelh zawhah mawhphurtu a nih thu sawi mah se, media a hmachhawn hnuhnung berah number 1 bik a neih loh thu a sawi.

Kum 41 mi coach chuan, "Khawi position-ah pawh ni se la, number 1 emaw, number 2 bik ka nei lo. Player-te khelh phak tumin an inel tur a ni a, he team tana khelh i phuzia i lantir tur a ni," a ti a, Sanchez chu number 1 keeper a nih bik loh thu a sawi.

Chelsea-ah hian Filip Jörgensen chu second choice keeper ni mekin, kum 23 mi keeper hi Denmark international a ni a, tun season-ah match sarih a khel tawh.

English coach chuan sawi zawmin, "Squad ṭha tak ka nei a, ka player-te zawng zawng hriata ka sawi duh chu hei hi a ni. Number 1 emaw number 9 emaw pawh ni se, bul ṭan chiang an ni lo. Team-a hmun chang turin tupawhin an beih a ngai," a ti.

Chelsea hian zanin dar 8:30-ah league match khel turin Brentford an mikhual dawn a, a awlsam dawn lo. Keith Andrews-a enkawl team hi inelna hrang hranga match an khelh hnuhnung parukah vawi nga an chak a, vawi khat draw an nei.

Rosenior hian Chelsea match hnih a kaihhruai tawhah FA Cup leh League Cup-ah a enkawl a, zanin inkhel hi Premier League-a Blues a kaihhruai hmasak ber tur a ni dawn a, chak ngei a duh ang.

Blues tan hliam tenau nei Cole Palmer leh Reece James te inlan theih dawn leh dawn loh a la chiang lo a, Liam Delap leh Jamie Gittens te chu damlohna avangin in lamah an inenkawl mek bawk.

Rosenior-a'n Arsenal laka a team a tlawmpui avangin dem a hlawh hran lo a, second leg a la awm bawk avangin result a la inherdanglam thei. Brentford laka an tlawm a nih erawh chuan Rosenior-a'n club lian enkawl hautakzia a hrethiam chho ṭan ang.