Bayern an chelh thei dawn em?

Bundesliga hmahruaitu Bayern Munich chu zanin dar 11:00 hian league match khel turin an inlan dawn a, table-a pathumna RB Leipzig an lenchilh ang - Bayern hian table chung ber an luah mek a, pahnihna Borussia Dortmund aiin point 11 ngawtin an sang fal zawk.

Bavarians hian ṭha taka kum bul ṭanin, Wolfsburg chu 8-1 in an hneh a, Ningani zan khan Cologne chu 3-1 in an hneh leh bawk a, hnehna chang turin harsatna an tawk lo. Bundesliga nomawi chawi turin kawng dik an zawh mek.

Goal veng turin veteran keepr Manuel Neuer chu dam tawhin, tlarhnung a phui phah hle. Fullback pahnih Alphonso Davies leh Josip Stanisic te inhliam mah se anmahni thlaktu Hiroki Ito leh Konrad Laimer te an khel ṭha viau.

Tlarhma lamah Harry Kane a awm leh dawn a, English striker hian tun season-ah league-ah ringawt goal 20 khung tawhin top scorer ni turin a dinhmun a ṭha hle. Michael Olise, Serge Gnabry leh Luis Diaz te an hmuhnawm a, Kane an thlawp ṭha thei hle.

RB Leipzig tan AFCON khelh hnua aṭanga lo kir Yan Diomande chuan training a zawm leh tawh bakah Christoph Baumgartner a awm a, player pahnihte hi league-ah goal ruk ve ve an khung tawh bakah an home-a khel tur an nih avangin Bayern tan chetsual theih a ni.