Mizoram State Games an hawng Kum 10 mi Mimi-i'n silver a la

Nimin khan Mizoram State Games chu RG Stadium-ah chief minister Zoramthanga'n a hawng a, December 13, Zirtawpniah a kharna neih a ni ang.

State Games-ah hian MLA Constituency 40 te chu infiamna 32-a intihsiakna 221-ah an inel a, opening ceremony neih hma hian infiamna ṭhenkhat khelh ṭan a ni tawh bawk.

Nimin khan Chanmari West naupang Mimi Vanlalṭhazuali chu Aizawl North III aiawha telin 5000m-ah pahnihna a ni a, Dampa aiawh Ruthi Lalhmingṭhai  chiah a tluk lo.

Lalthianghlimi fanu Mimi hian July 30, 2019 khan kum 10 a tling a, Mizoram pum huap inelnaa lawmman la tur hian a pu Zothankhuma'n a thlawp ṭha hle. Mimi hian kum 2013 aṭang khan a pu Khuma nen hian training an nei ṭan tawh a, Lammual a tlan hel ṭhin avangin hretu pawh a ngah. A pianpui theihna sang tak leh a thawhrimna avangin lawm a hlawh hle. Tun ṭum inelnaah hian Mimi hi  800m, 1500m leh 100m x 4 relay-ah te a la inlan ang.