Wilder ka knockout ngei a ngai - Fury

February 22-a Deontay Wilder nena a vawi hnih nana inhnek tur Tyson Fury chuan American boxer chu tuk dawl ngei a tum thu a sawi a, hnehna tichiang tura thil pawimawh berah a ngai. 

December 2018 khan boxer pahnih hi an lo inhmachhawn tawh a, chak zawk awm loah puan an ni. Hei hi Fury chuan thlirkirin, "Ka ngaihdanah chuan khami ṭum pawh khan ka chak ngei a ni. 

"Hnehna ka chang ngei a ni tih pholan nan knockout ka mamawh tawh. Sawisel hlawh tak result neih leh ka duh tawh lo a, chiang taka hnehna chan ka duh a ni," a ti. 

Gypsy King tia hminglem an pek Fury hi Wilder nen an inhnek hmasak ṭum hian round kuana leh 12-naah a tlu a, mahse tho lehin ṭha takin a inhnek chhunzawm.

Kum 31 mi boxer rorum chuan, "Judge ka ni lo a, an thil hmuh angin thutlukna an siam a ni mai. Tunah chuan ka kuttum pahnihah hian ka hma hun a innghat a ni," a ti. 

Las Vegas khawpuia an inhnekna tur atan Fury hian he khawpuiah hian kar riat chhung training a nei tawh a, Wilder nen an intawn hmasak ai khan a 

ṭhat tawh zawk thu a sawi bawk.