Milan chak zawn ve leh ta

AC Milan chuan kawng dik an zawh ve mek zel. Pathianni zan Serie A inkhelah Milan hian Bologna 3-1 in an hneh a, tun season chhunga league match bika an khelh ṭhat berah a ngaih theih.

Milan tan hian Krysztof Piatek, Theo Hernandez leh Giacomo Bonaventura ten goal khat ṭheuh an khung, mualneitu Bologna goal pahnih hi Hernandez-a'n anmahni lama a tih luh bakah Nicola Sansone khung a ni thung.

Beisei anga season hmang ṭha lo Milan hi Juventus an ngam loh hnuah an insiamṭha, an match hnuhnung pathumah chak loh an nei lo. Napoli nen an inhnehtawk bakah Parma leh Bologna te an hneh. Serie A match 15 khelh tawhah Milan hian point 20 hmuin 10-na dinhmun an luah mek, a sang pali zinga awm Cagliari an phak lohna chu point kua ngawta tam a nih tawh avangin Champions League khelh erawh an sawi ri ngam rih lo ang.