Manchester City-in Guehi an la dawn

Manchester City-in Josko Gvardiol leh Ruben Dias te inhliam vangin tlarhnungah an buai a, thlasik bazarah Crystal Palace defender Marc Guehi an lalut dawn. Nimin khan English defender hian City-ah medical a nei a, he thu i chhiar meuh chuan City player a ni tawh hial ang.

Pep Guardiola hian Guehi hma hian Bournemouth aṭangin £62.5mtd-in Antoine Semenyo a lalut tawh a, tun season chawhma lama che ṭha pahnih an lalut thei a nih chuan an squad a chhah sawt ang. Chutihrualin Old Trafford-ah match hmasa pahniha goal khung thei leh man of the match ni thei Semenyo dah ṭhatin a awm.

City-in kuminah league-ah chak hmel an la hmu lo a, Arsenal-in hun ṭha hmang ṭangkai loin an inkar point kua nih thei chu point sarih a ni ta thung. Pep Guardiola chuan, "Team ṭha zawk an chak. An ṭha zawk miau chuan kan pawm mai a ngai. Kan neih loh phurna leh thahrui an nei a, goal chance an insiam hnem. Chutihrualin goal kan chhuah ho ve bawk," tiin an khel ṭha lo tih a pawm a, tlarhnung a siksawi ngei dawn tih a chiang.

Arsenal nena an inkar chungchang sawi zuiin Pep chuan, "Team anga hma kan sawn a ngai. Kan thlen chinah chuan kan ti ṭha viau a, hmasawn tur pawh hian tawlh hnun hlek hi a ngai ṭhin. Season hmabak thui tak a la awm a, kan la inzir zel ang," tiin beiseina a la neih thu a sawi. Gunners-in City veltu Man United an hmachhawn ve thung ang.