Karate C'ship-ah Heritage Hills Academy

Karate hmanga Mizoram sikul hrang hrangte an inelna, Mizoram Inter School Karate Championship chu neih zawh a ni ta a, gold 10 ngawt latu Heritage Hills Academy School chu team champion an ni.

Aizawl West Joint YMA Hall-a neih inelnaah hian team champion Heritage hian gold 10 bawkah silver pariat an la tel a, bronze medal phei chu 17 ngawt an hlawh chhuak - pahnihna hi gold pariat latu Zomuansang Elementary School niin, gold panga latu La Montessori School chu pathumna an ni.

Mizoram pum huapa school naupangte inelnaah hian karate thiam mi 218 ngawt an inlan a, school tel hi 68 ngawt an tling - tournament hlawhtling tak tih loh rual a ni lo.

Karate thiam mi 200 chuang inlan zingah Genesis English School naupang Malsawmtluanga chu Best Karate (Male) atan thlan a ni a, hmeichhe lamah chuan Model English School naupang Monica HS Sangi chu Best Karate a ni thung.

Hetihlai hian hmabak nei êng player, Most Promising pawh thlan a ni a, C. Vanlalhriata (Home Missions School) chu mipa zingah thlan niin, Kendrya Vidyalaya lam aṭangin Mercy Lalbiakdiki chu Most Promising Female atan thlan a ni.