Coach thar hoin Chelsea an chak

Chelsea-in coach thar Liam Rosenior hnuaia an match hmasa pahnihah chak leh chak loh result an nei - FA Cup-ah Charlton Athletic an pet chhuak a, League Cup semifinal first leg-ah 3-2 in Arsenal an ngam lo thung.

Inrinni zanah London club-in an inelna ngaihhlut ber Premier League match an khel ta nge nge a, Rosenior hnuaia an league match khelh hmasak berah an chak nghal - an mikhual Brentford chu 2-0 in an hneh.

Blues tan Joao Pedro leh Cole Palmer (penalty) ten goal khat ve ve an khung a, Brentford lamin a chhanletna tur an neih loh avangin Chelsea an chak. Blues-in point thum an hlawhchhuah avangin an lawm ang tih a chiang a, hnathawh tur an la nei tih erawh a lang tel bawk.

Brentford-in Stamford Bridge-ah chak an tum ngam a, hei ringawt pawh hi Blues tan inenfiahna tham a tling. Kevin Schade-a'n chance vawi hnih nei mah se, a chhawr lo ve ve a, Mikkel Damsgaard a pekte kha aman shot mai se, thawnthu a danglam mai thei!

Chelsea pawhin chance an nei ve tho a, mahse, Palmer-a'n an chance neih a khawhral a, Pedro lah a penalty beisei pek a ni lo bawk. Minute 26-naah erawh Joao Pedro a vannei a, Enzo Fernandez thawhrim zara Michael Kayode-a tihsual chu goal hmahruai khung nan a hmang.

Brentford tan Damsgaard, Schade leh Mathias Jensen ten si phurh sut theihna remchang nei vek mah se, an chhawr lo a, Chelsea tan Alejandro Garnacho chuan goal ruakah a khung bik lo!

Second half ṭantirhah Schade bawkin chance duhawm nei mah se, Arsenal laka vawi hnih ngawt chesual, Chelsea goalkeeper Robert Sanchez-a'n number 1 nih a la phu tih pholangin, ṭha zetin a dang a, tun season-a league goal 16 khung tawhtu Igor Thiago meuh pawh a ke hmui zan a ni lo a, an talbuai.

Brentford-in an nawr reng avangin Chelsea boss Rosenior-a'n Garnacho la chhuakin, defensive midfielder Andrey Santos a luhtir a, a tisual lo - Bees goal nawr na sawt mah se, Santos-a ṭangkaina hmuhtir kan ni a, Chelsea an ding khawng.

Minute 76-naah Chelsea vanneihna belhchhahin a awm a, Rosenior-a substitution siam a fuh zel tih pawhin a sawi theih. Bench aṭanga luhtir Liam Delap-an penalty a hlawh chhuak a, Palmer chuan goal-ah a chantir - goal dang luhna hun a awm tawh lo a, 2-0 in Chelsea an chak.