AFCON : Egypt hnehtu Nigeria pathumna

African Cup of Nations-ah Nigeria-in Inrinni khan pathumna zawnnaah Egypt an hneh. Mohammed V Stadium, Casablanca-a inkhelah hun pangngaiah goal a lut lo a, penalty shootout-ah Mohamed Salah telna Egypt 4-2 in an vanduai a, AFCON-ah Nigeria pathumna an ni.

Pathumna zawnna inkhelah ram pahnihte'n match hmasa lama an player pawimawhte an luhtir lo a, first eleven-a a tam zawk chu tun inelnaa bench lama hun hmang tam zawk an ni. An ṭhat dan ber lut lo mah se inkhel boruak a san loh phah lo a, nung takin a tir aṭangin an khel a, pathumna zawnna ni nachungin ram pahnihte an ṭang hle.

Inkhel a hmuhnawm a, chance hlauhawm erawh kan hmu lawk lo. Minute 36-naah tun inelnaa goal hnih khung tawhtu Akor Adams chuan Super Eagles hmahruaina goal a tauh lut mah se, offside position-a awm Paul Onuachu-a'n a lo khawih hman avangin goal-ah pawm a ni lo. Pharaohs tan an thiampuipa Mohamed Salah a che thei bik lo.

Second half ṭantirah bench aṭanga lut Ademola Lookman-a'n Nigeria hmahruaina goal a tauh lut a, Lookman offside vang bawkin sut leh a ni. Ram pahnihte'n chance nei chhunzawm mah se goal hmaah an hriam tawk lo. Hun pangngaiah an goal awm loa an inhnehtawk avangin penalty shootout hmanga chak zawk zawn a ngai.

Penalty shootout-ah Nigeria tan Fisayo Dele-Bashiru-a'n pet goal lo mah se Egypt tan an innghahna pahnih Mohamed Salah leh Omar Marmoush ten an hlah avangin Nigeria 4-2 in an chak.