Martinez hoin Inter-in hma hruai zel

Inrinni zan Serie A inkhelah table hmahruaitu Inter Milan chuan an mikhualna ramah Udinese 1-0 a hnehin an hma an hruai chhunzawm zel a, Inter goal awmchhun hi an striker chhuanvawr Lautaro Martinez-a khung a ni.

Inkhel ṭan aṭangin Inter an hlauhawm a, Federico Di Marco leh Lautaro Martinez ten Udinese keeper an rum ṭhaih nghal.Lautaro Martinez a nung a, a vanneih zan ni se goal tam zawk khung thei tur a ni. Minute 20-naah Argentine forward Martinez-a'n box chhunga a ball hmuh chu defender venna karah cool takin a khung a, Inter chak nan a tawk. Martinez hian tun season Serie A-ah goal 11 khung tawhin tlarhma lamah Inter innghahna ber a ni.

Cristian Chivu hote hian table-ah hmahruai chhunzawm zelin anmahni hnaih bertu an hmelma club AC Milan nen point rukin an inthlau a, an inthlauhna hi nizana AC Milan result a zirin a la danglam thei thung.

Inkhel dangah Napoli chuan an mikhual Sassuolo chu Stanislav Lobotka goal hmangin 1-0 in an hneh a, table-ah pathumna nih chhunzawmin an hnuai chiaha awm Juventus nen point liin an inthlau. Juventus hian Cagliari chu 1-0 in khualmualah hneh lo.