Foxes leh Vardy an kal sang zel

Jamie Vardy chuan a zawnin Premier League match riat chhung goal a khung ta a, English striker hian a goal khungna match pariatah hian Leicester City chu hnehna chanpui vekin an chak zawn rei ber record an siam nghal bawk.

Brendan Rodgers-a enkawl Foxes hian Pathianni zan khan Aston Villa 4-1 in an luhchhuah, inkhel dangah Sheffield United chuan si an phurh hmasak hnuah Norwich City 2-1 in an hneh let. Brighton leh Wolves te erawh 2-2 an inhnehtawk.

Villa Park-a inkhelah mualneitu lamin goal khung theihna hun an nei hmasa, mahse Anwar El Ghazi chuan hnai zet aṭangin Matt Targett-a cross pet luh zeuh mai tur chu bar a tihper dawp. Kelechi Iheanacho ball pek dawngtu Vardy-a'n Villa keeper Tom Heaton a bum hnuah pet sual deuh mah se ball la fuh leh nghalin goal hmahruai a khung a, inkhel thununtu Foxes bawkin Iheanacho hmangin an goal hnihna an khung.

Villa captain Jack Grealish-a'n chawlhlawk hma deuhin an beiseina siam turin goal khat khung ve mah se, second half tir lamah defender Jonny Evans chuan corner aṭanga ball rawn kal chu goal kilah chiang zetin a tauh lut.

Leicester lamin an la duh tawk mai lo, midfielder Dennis Praet hnen aṭanga a ball hmuh chu Vardy-a'n chak taka tlanpuiin defender a tlan pel a, English striker hian keeper Heaton dan theih loha goal khungin an chak a nemnghet.

Leicester City manager Brendan Rodgers chuan a naute khelh dana a lawm thu a sawi a, nomawi inchuh boruak sang vela an team sawi hmaih an ni ṭhin chu an tan a ṭhat thu leh a lawmawm zawk thu a sawi chhuak bawk.

Premier League match 16 khelh tawhah Foxes hian point 38 hmuin pahnihna an ni - champion lai Manchester City aiin point rukin an sang zawk a, hmahruaitu Liverpool an phak lohna chu point riat a ni chhunzawm zel.

Rodgers chuan, "Manchester United laka Manchester City an chak loh khan Liverpool lakah City chu eng zatin nge an hniam zawk tih chu mi ngaihven a ni a, hei hi kan tan a ṭha hle. Keini lam chuan kan hmaa hna thawh tur awm hi ṭha takin kan thawk zel mai a ni," tiin team dang an ngaihtuah loh thu a sawi.

Krismas vuakvet laiin Leicester City hian Manchester City (December 21) leh Liverpool (December 27) te an hmachhawn dawn a, EPL a ngaihnawm chho dawn. Foxes hian 2015-16 season khan mak takin league nomawi an chawi a, vawi hnihna hi thleng thut thei dinhmunah a ding.

Southamton tan Danny Ings-a'n goal khung leh mah se Newcastle United lamin Jonjo Shelvey hmanga an sut bakah hun tawp dawn hnaiah defender Federico Fernandez chuan chakna goal a khung. Tun season ṭan nia an chak loh bak chu St James' Park-ah league match-a tlawm an nei tawh lo.

Wolves tan Jota-a'n Premier League-a a goal 10 leh 11-na a khung, amaherawhchu mualneitu Brighton lamin Neal Maupay leh Davy Propper te hmanga goal hnih an neih ve avangin point khat ve veah an lungawi a ngai - Nuno Espirito Santo-a naute hi match 11 chhung chu tlawm loin an kaltluang mek.

Season tir lamah khel ṭha mah se Norwich City an zuih mek zel. Alexander Tettey hmanga an goal hmahruai chu Sheffield United lamin Enda Stevens leh George Baldock te hmangin an thungrul, Norwich hi a hniam ber dawtah an awm mek; Sheffield erawh pariatna dinhmun luahtu an ni thung.