India aiawhin Mizo Muaythai player pali an feh chhuak

Olympic Cuncil of Asia hnuaia Amateur Muaythai Association of Asia (FAMA) buatsaih IFMA Asian Muaythai Championship chu December 17-22 chhung hian Abu Dhabi-ah neih a ni dawn a, India aiawh tur zingah Mizo player pali an tel.

India aiawh tur hian player 18 an kal dawn a, chung zingah chuan Mizo player pali Joseph Vanlalhruaia, Hunthar (-48kg), Lalṭhasanga Lelhchhun, Venghlui (-86kg), Ngurlianzuala Sailo, 3rd Bn MAP (-91kg) bakah junior player Eliza Zoramchhana, Kulikawn (-34kg) te an tel dawn a ni. 

Joseph Vanlalhruaia hi thla hmasa khan Senior National Muaythai Championship, Mangaluru, Karnataka-a neihah Best Fighter-a thlan a ni, a khelhna -48kg huangah gold medal a la. Lalṭhasanga leh Ngurlianzuala te pawhin gold medal an la bawk, Eliza Zoramchhana hi junior national championship hnuhnung bera gold medalist a ni ve bawk.

Mizo fighter-te hian vawiinah Aizawl chhuahsanin Delhi an pan dawn a, India camp an zawm nghal ang. Delhi aṭangin India team-in December 16 hian inelna neihna tur hmun Abu Dhabi an pan ang a, Mizo player-te hi December 23-ah Aizawl an lo thlen leh theih beisei a ni.