Champion lai Liverpool dinhmun a chiang dawn

Champions League khelh hun a lo thleng leh ta a, champion lai Liverpool chu last 16 la lut chiang lo team zingah an tel - zaninah an dinhmun chinfel a ni dawn. 

Premier League hmahruaitu hian zanin dar 11:25-ah Red Bull Salzburg an lenchilh dawn a, Austrian club lakah hian an tlawm a nih chuan knockout round luh beiseina a thamral nghal ang. Group E inkhel dangah zanin dar 11:25 vek hian Napoli chuan Genk an mikhual dawn a, Italian club hian hnehna an chan chuan last 16 an lut ang - Belgian club lakah harsatna an tawk lo tura ngaih a ni. 

Premier League club langsar Chelsea dinhmun a la him bik lo - last 16 lut turin zanin dar 1:30-ah Lille hneh an mamawh. Hriat tel tur chu group H-ah hian Blues ang thoa beisei nei Ajax leh Valencia chu zanin dar 1:30-ah an intawng ang. 

Liverpool tan chak emaw draw result hlawhchhuah a tawk a, a pawi ber erawh Red Bull hi hneh an awlsam dawn lo - he team hian rawlthar ṭhangduang Erling Braut Håland an nei. Kum 19 mi forward hian tun season match 21-a khelhah goal 28 a khung tawh a, Champions League match ngaa goal riat a khung tawh hi a class sanzia pholangtu a ni. 

Haland piahlamah Japanese winger Takumi Minamino, South Korean forward Hwang Hee-chan leh league match 16-a goal 13 nei tawh Patson Daka lam hmaih an thiang lo a, Reds tana mangchhia thlen turin an ṭha tawk. 

Liverpool hian hnehna an chang lo a nih pawhin tlang theih dan an la nei tho a, chu erawh thilmak a thlen tel a ṭul - tla tawh Genk-in Napoli an hneh a ngai ang. 

Jurgen Klopp-a'n December fixture an neih hautakzia hre ranin player a siksawi chho ṭan a, zanin match erawh round of 16-a an dinhmun hril tur a nih avangin an ṭhat dan bera an inrem a rinawm. Tlarhmaah Mohamed Salah, Roberto Firmino leh Sadio Mane an inkawp leh a beiseiawm a, tunlai khawvela tlarhma inkawp hlauhawm ber pawl hi Salzburg tan chelh an harsa ang. 

Bournemouth lakah Dehjan Lovren chu hliam vanga lakchhuah a ngai a, Klopp chuan a player dinhmun hi ngaihtuahawm lo tiin sawi mah se Virgil van Dijk kawppui turin Joe Gomez a luh a rinawm zawk. Georginio Wijnaldum leh Adam Lallana ten hliam vangin Bournemouth hmachhawn thei lo mah se an dam leh tawh a, Klopp-a'n a duh phawt chuan a hmang thei ang. 

Frank Lampard enkawlna hnuaiah Chelsea-in team an din chho mek niin an inngai a, an league match hnuhnung pathumin thawnthu dang min hrilh thung - vawi hnih an tlawm! Everton laka 3-1 a tlawm hlim team hian Lille an hneh chuan Ajax leh Valencia inkhel result-in an dinhmun a sawi nghing pha dawn lo a, chiang takin last 16 an lut ang. 

Chelsea hian Lille an inhnehtawkpui a nih chuan Ajax-in Valencia an hnehsak a ngai dawn a, chumi hrilhfiah dan awlsam ber chu Frank Lampard naute hian chak ngei ngei an mamawh tih hi a ni. Blues hian tun hnaiah player inhliam leh hrem tuar an nei lo a, an ṭhat dan ang bera Lille hmachhawn tur an nih avangin fan-ten chak result lo chu an beisei lo ang.