Venus a ṭang tluan thei lo

Pathianni khan Australian Open-ah Venus Williams a inlan a, AO khel thei upa ber ni mah se hnehna a chang thei ta lo. Kum 45 mi Venus hian Grand Slam vawi sarih champion tawh a, tun ṭumah hian wild card hmangin a tel.

American tennis star hian kum 24 mi Serbian Olga Danilovic a hmachhawn a, darker hnih leh minute 17 zet inkhelah a vanduai ta zawk. Venus hian set hmasa ber 7-6 (7-5) in a la a, Danilovic hian 6-3 in set hnihna a rawn la a, set thumna a hmuhnawm.

Set thumnaah hian Venus hian game hmasa pali a rawn la nghal a, mah se Serbian nula hian a thahrui rawn hmang ṭhain game hnuhnung paruk a rawn la vekin 6-7 (5-7), 6-3, 6-4 in hnehna a chang.

Venus chuan, "Inkhel ropui tak a ni a, ka tan chuan hun ropui tak a ni. Mipui thawm a ṭha a, nasat akin minti phur. Ka khingpui Olga khan game ṭha tak a khel a, a vannei tel bawk. A tawpah chuan infiamna a ni a, hetianga tawp hun hi a awm ṭhin. Ka khelh danah ka lawm a, match tinah hma ka sawn. Tunah chuan tihsual nei tlem turin ṭan ka la ang," tiin a sawi.

AO-ah chak lo mah se Venus hian tennis chawlhsan a tum lo a, major tournament-a kum nga chhung khelh loh hnuah tun ṭum inelnaah hian a rawn tel. Tennis khawvelah huhang a neih ṭhat avangin Venus hian Grand Slam danga a inlan a nih pawhin thilmak a ni lo ang.