Silly Point: A sak loh hming K-a
Cricket Association of Mizoram hnuaia kan arsi lian ni pha K.Lalremruata (K-a) chuan kar liam ta lawk khan khelmualah mual min lo liamsan ta a. He leia nipui ṭum 39 lek a rawn hmachhawn chhung hi tawi viau mah se, cricket Mizoram khawvel tan erawh hnutchhiah ṭhahnem tak a nei a, sawi in a siak dawn lo a, thai lan sen a ni kher lo ang.
Vanduaina thleng zeuh zeuh
Cricket hi outdoor inkhel ṭhenkhat anga game ri buan buan leh chak taka tlan deuh fua fua reng ngai (anaerobic) angin lang lo mah se, hun rei tak inkhelh chhunga a khat tawka theihpalingkawha tlan thut ngai, chawlh leh deta, tlan leh thut ngai a ni a.
Mithiamte chuan aerobic & anaerobic sports inkawp an ti reng a ni. A inkhelh chhung a lo rei bawk nen, hahdam taka khelh theih angin lang mah se fitness neih ṭhat ngai takzet. Tun kum nga liam ta chhungin CAM lamah player pathum ngawtin khelmualah nunna an chan ta hian ngaihtuahna a ti thui a, fimkhur leh zual nan hman a ngai hial awm e.
Tin, team inkhel ni si, mahse individual inelna ni tlat bawk si hi cricket leh baseball bak hi a awm lo, an tih fo hi a lo dik hle mai ka ti leh hnuhnawh. Football, volleyball-ah chuan mahni khelhpuite tel loin a chet theih loh ang tluk a ni.
Cricket-ah chuan mahni chauhin ball i hmachhawn theih a, mahni chauhin ball i vawm theih a, mahni tein ball i um a ngai. Mimal takin chona i va hmachhawn a ngai a, i teammate-te thlazar hnuaiah ni loin, mahriak teiin chona i va hmachhawn a ngai a, chu chuan rilru leh ngaihtuahna nasa takin a nghawng ṭhin a ni.
Keya
Mizoram local cricket lamah K.Lalremruata hi batsman ṭha ber leh hlauh rawn ber kum rei tak a lo ni ṭhin a. Local cricket-a club inelnaah phei chuan team leh mimal chawimawina hi a lo dawng fo a. He thuziaktupa nen hian kan hmingpum hi a inhnaih em avangin mi pawn min ral hriatpawlh fo reng a ni.
Coaching leh technique mumal tak zira rawn inchherchhuak a ni lo a, Mizoram tualcher mahni pianpui talent hmanga tun dinhmun rawn invawkai thei a nihna te hi a fakawmna pakhat a ni. Khatia BCCI hnuaiah 2018 kuma professional cricket kan han luh ve tak thut pawh khan, player pawimawhte zinga mi a ni a, kum 30 ral lo kai tawh ni mahse, coach ṭha leh support staff ṭha hnuaiah chuan a lo la inzirmi ngei mai. K-a tia kan koh ṭhin kha, kan hnam dang hotuten an ko thiam ta lo thin a, Keya tih hi Mizoram team-ah a pu hlen ta a ni.
Zopa diktak
Cricket inkhelh atchilh, inkhelh loh laia a hun awlah chuan ramvah leh loa feh te nuam ti em em mai K.Lalremruata hi a kianga awm nuam hle. Mi pawi sawi lo, zin nikhua pawn hotel vela a pindan hi team te luhkhawmna a ni a, K-a a awm tawh chuan nuih dur dur hi kan hmabak a ni deuh ber mai.
Midang fuih a thiam a, mahni lungawi lohna erawh a sawi chhuak mai mai lo. A khaikhawm nan - team man diktak K.Lalremruata kan han thlah a ngai ta mai hi vawiin thleng hian mumang a ang ka la ti a ni.
Tlawm ngai lo tlangval tlawmngai
Mihring hi an damrei avanga mi ropui an ni kher lo a, fam an chan hma avanga hlu lo bik pawh kan lo ni chuang lo. Kan LALPA ISUA kha kum 33 lek he leiah a zinkawng hmang mah se, damchhung hun hmang ṭha leh mi ropui a chhal a ni a, hring miah pawh Alexander Ropuia kha Ropuia ni tur khan kum 32 lek he lei anchhe dawngah khan a mamawh a ni.
Ka teammate, ka nau, ka thianṭha K-a hi mimal taka kan inhmuh hnuhnung ber chu nikum Mim kut thla vela Mizoram team Probable camp Sihhmui lama kan inkulh khan a ni ta mai awm e. A kum a lo upa ve deuh tawh a, main team lamah chuan hmun chang zo ta chiah lo. Chutihrualin a hminga hotute duhsakna avanga team enkawltu a min han ruat ve ta chu, khami tum pawh khan nuihna tur tamtak karah technical thil kan la sawi dun a ni.
Ranchi lama inkhela kan awm bo laiin Krismas chibai inbuk pahin Krismas tukah whatsapp-in min rawn bia a, chutah pawh fiamthu leh a hlimawm hlirin a la ni a. Chu erawh kan inbiak hnuhnung ber a ni ta, kum a lo thar a, hetiang hi kan ni zui ta a ni.
K.Lalremruata, i nuam tih ber leh hmangaih ber cricket khelmualah van kohna min chhansan ta mai hi ngai chung leh ui viau chung chein, a ropui dangdai ka ti leh hnuhnawh em em a. Mizoram cricket-a i hmun ruak hnutchhiah hi a zau dawn hle mai. Ṭhangthar i hnung rawn zui zel turten, Mizopa tlawmngai leh rilru ngil, tlawm duh ngai lo infiammi i nihna hi rawn chhawm nungin rawn sawi nawn fo teh se.
Mangtha le, K-a.