Real Madrid lawm nan Barca an tawlhthlu!

La Liga hmahruaitu Barcelona chu Real Sociedad khelmualah 2-1 in an tlawm a, La Liga inum boruak a nung leh sawt - pahnihna Real nen an inkarah point khat chiah a awm leh ta!

Sociedad hian Mikel Oyarzabal hmanga goal hmahruai khungin, Barca-in Marcus Rashford hmangin si phurh sut mah se, Gonçalo Guedes-a'n a khung ve leh a, 2-1 in Sociedad an chak daih.

Hun tawp nan minute hnih chiah a awm tawh tihah Carlos Soler chu red card pek a ni a, mahse, hun a tlem tawh avangin Barca tan awmzia a nei phak lo.

Vanduai zan

Barcelona tan an vanneih zan a ni lo. Penalty pek an nih zet hnuah sutsak an ni a, Dani Olmo-a'n post vawi hnih ngawt a tihper a, an goal khung vei thum ngawt pawmsak an ni lo bawk.

Fermin Lopez, Frenkie de Jong leh Lamine Yamal te chuan minute 30 chhungin goal khung ṭheuh mah se, offside vanga pawm loh vek a ni! Minute 32-naah Sociedad tan captain Oyarzabal chuan a khung a, hei erawh pawm a nih avangin 1-0 a ni.

First half hun pek belhah Yamal-a'n penalty a hlawh chhuakah a inngai. Referee pawhin penalty spot a kawk vek tawh a, mahse, VAR a rawn hnuah offside vang thoin penalty a pek tawh pawh a sut!

A tluang lo

Second half-ah pawh Barca-in na takin an nawr a, Olmo chuan second half ṭantirhah vawi hnih ngawt post a tihper a, bench aṭanga luhtir Robert Lewandowski-a ball tauh chu Sociedad keeper Alex Remiro chuan bar a nam per bawk.

Barca tan bench aṭanga luhtir Rashford chuan minute 70-naah si phurh sut mah se, an hlim authawm pawh a reh fel hmain Guedes chuan a khung ve leh a, Barca an che fuh thei lo!

Catalan club tan Jules Kounde pawhin chakna goal khungna remchang nei mah se, bar a tauh per a, Carlos Soler hnawhchhuah pawhin an tam awmzia a nei phak ta lo - Barca an tlawm a, La Liga a ngaihnawm leh ta sawt.