Magpies-in goal an khung lo

Newcastle United-in Premier League top five-a invawrhkanna remchang nei mah se, Wolverhampton Wanderers lakah goal khung an harsat a, 0-0 a inhnehtawkin, point khata lungawi an zir.

Beisei anga season hmang lotu Magpies hian tun hnaiah result an nei ṭha a, Wolves lakah hian chak se chuan, April 2025 hnua league match li a zawna an chak leh hmasak ber ni thei tur a ni a, mahse, Premier League table mawngphah luahtu team lakah goal an khung thei lo.

Newcastle tan pound maktaduai 69 man, tun hnaia goal khung hleithei lo, striker pasang Nick Woltemade a chet chhiat chhunzawm zel a, a goal khung harsat a ṭhulh thei rih tlat lo - Magpies tana a match hmasa bera goal khungtu striker hian an match hnuhnung 19-ah goal thum chiah a khung!

Woltemade hi second half-ah Yoane Wissa chuan thlak mah se, danglamna thui tak a thlen thei bik lo - minute 85-naah a vawi khat nan target zawnah shot an nei ve chauh!

Magpies boss Eddie Howe chuan, "Striker mamawh belh pawh ni ila, lei belh turin kan sum neihin a tlin lo ang. Ka duh angin kan nawr na tawk lo a, hetiang ang hian inkhel dangah pawh kan lo ti fo tawh.

"Ka naute rilru puthmangin min tilawm a, theihtawp pawh kan chhuah a, mahse, kan quality tawk lo. Zanin angah kha chuan mimal pakhat danglamna thlen thei kan mamawh a ni," a ti a, player mal khai pawha team chakpui thei nei loah a inngai.

Wolverhampton Wanderers hi tun season-a a vawi khat nan league match li tlawm loin an kaltuang ve ta a, vawi khat chiah an chak thung - table mawngphah an la luah a, tun hnai an result hian beiseina erawh a siam thar ve lehin a rinawm.