Mimal aia club dah pawimawhtu Auba

Pierre-Emerick Auba-meyang chuan season hmasa ang bawkin Premier League goal khung hnem ber nih theihna kawng atan a inhawng mek tih a sawi a, mahse mimal lawmman ai chuan club hlawhtlinna a ngaih pawimawh thu a sawi tel bawk.

Season hmasa khan Auba hian league goal 22 a khung a, Liverpool forward Mohamed Salah leh Sadio Mane te nen an pathumin Golden Boot an dawng. Season kal laiah goal 14 khung tawhin, khung hnem ber Jamie Vardy aiin goal thumin a khung tlem.

Kum 30 mi Auba chuan, "Goal khung hnem ber ni leh thei ila chu duhthusam a ni, chutih rualin club hlawhtlinna hi a pawimawh zawk. Tunah chuan match kan khelh hmabaka hnehna chan theih dan kan ngaihtuah a ngai," tiin a sawi.

Gunners hi EPL table-ah 10-na an ni mek, a sang pali zinga mi an phak lohna chu point 10 a ni. Kumin bikah league match an khelh zingah vawi khatah chiah hnehna an chang thei, season thara Champions League khel phak tur chuan midang result an ngaihchan tel a ngai tawh.

North London club hian Dubai lamah thlasik chawlh an hmang zo chiah, Pathianni zan dar 10:00 hian Emirates Stadium-ah Newcastle United an mikhual ang - Europa League lamah Olympiakos nen an inkhelh zui dawn avangin result ṭha neih a pawimawh ang.

Gabon international chuan manager thar Mikel Arteta hnuaiah beisei an neih thu sawi zuiin, "Nitin mai hian hma chu kan sawn zelin ka hria, season tir lam ai kha chuan kan khelh dan phung pawh ka bel tawh. Dubai-a hun kan hman hian taksa sawizawi bakah player inpawhtlanna min siamsak bawk," tiin phur taka season an hman chhunzawm tur thu a sawi.