League Cup final-ah Gerrard a tlawm

Liverpool legend Steven Gerrard chuan manager puitling a nih hnua a nomawi hmasa ber beisei mah se Scottish League Cup-ah Celtic a ngam lo a, 1-0 in an tlawm. 

Celtic hian inkhelh chhung zawngin target-ah vawi khat chiah shot nei mah se an shot neihchhun hi minute 60-naa Christopher Jullien-a goal khung a ni a, French defender hi offside deuh niin lang mah se match official-in goal an pawm tlat!

Minute thum hnu lawkah Jeremie Frimpong chu Alfredo Morelos a tih tluk avangin red card pek a ni a, penalty a chawi bawk. Mahse, Colombian striker Morelos hian goal-ah a chantir thei lo. Celtic keeper Fraser Forster chu fak phu a ni a, penalty a dan bakah hian Morelos goal khung tur nia lang chu vawi thum ngawt a dansak a, Ryan Jack-a khung tur a dansak phei chu pui tak a ni. 

Rangers boss Steven Gerrard chuan, "Kan khel ṭha takzet a, kan vawi khat tihsual kan tuar a ni. Player pahnih emaw pathum chu an offside ngei niin a lang a, chuti chung chuan kha aia ṭha zawka ti thei kha kan la ni tih ka hria," a ti a, result-ah a lawm lo.