Spurs-in Thomas Frank ban mai thei

Tottenham Hotspur chuan an head coach Thomas Frank ban chungchang an ngaihtuah ṭan niin khawthlang media-te chuan an tarlang a, thla sarih vel lek London khawpuia la cham coach lakah hian rinna nghah an harsat ṭan.

Danish coach hian nipui lai khan Brentford chhuahsanin Spurs a zawm a, mahse, an beisei ang erawhin hna a thawk lo thung. Heti chung hian Spurs thuneitute chuan a chunga rinna nghah an thlang a, zawi zawia Premier League team ngheta Brentford a din dante chu inhnem nan an hmang.

Mahse, Spurs hian Inrinni zan khan West Ham chu league-ah 2-1 in an ngam lo a, tun season-a Premier League team ṭha lo ber pawl laka an tlawm hnu hian Spurs thuneitute chuan ngaihtuahna thar an seng niin an sawi.

London club hotute hian Frank hi la nghah rih hret nge ṭha ang, ban nghal mai tihah thutlukna an la siam fel thei lo - tunah hian EPL table-ah 14-na an ni mek a, tun season-a league match 22 an khelhah vawi sarih chiah an la chak!

Hammers laka an tlawm ṭumin Spurs fan-te chuan, "Naktukah an ban dawn che," tiin an coach ngei hi an au el a, Brentford-a hlawhtling tak coach hi ban dawn pawh ni se, pawi an ti lo tih a chiang.

FA Cup leh League Cup aṭangin Spurs hi an tla tawh bawk a, Champions League table-ah 11-na niin, UCL-ah tal hming chher an mamawh hle - zanin dar 1:30-ah Spurs hian Champions League khel turin Borussia Dortmund an mikhual dawn.

Spurs leh German club hian point 11 ve ve an nei mek a, damkhawchhuah theihna tura chak mamawh ve ve an nih avangin zanin inkhel tur hi a hmuhnawm khawp ang.