Kohli-a'n India a chhan zo lo

Pathianni khan India leh New Zealand ten ODI match thumna an khel a, Virat Kohli-a'n century siam mah se Men in Blue chak nan a tawk zo lo. Black Caps-in 41 runs-in hnehna an chang a, 2-1 in series an la.

Holkar Stadium, Indore-ah India-in vawm hmasak an thlang. Opener pahnih Devon Conway (5) leh Henry Nicholls (0) te out hma mah se Daryl Mitchell (137) leh Glen Phillips (106) ten century siam ve vein over 50-ah 337/8 run an siam.

India tan target a sang hret a, chutihrualin an batter-te thlirin umphak theih a ni. Rohit Sharma (11) leh captain Shubman Gill (23) ten beisei an pha lo. Kohli-a'n 124 runs zet a siam a, Nitish Kumar Reddy (53) leh Harshit Rana (52) ten rawn thlawp ve bawk mah se a tawp an thlenpui zo lo.

Men in Blue-in over 50 an thleng zo lo a, over 46-ah thi vekin 296 runs chauh an siam. India leh New Zealand hian match nga awmna T20 series an khel chhunzawm lehnghal dawn. Hei hi February thlaa neih tur T20 World Cup inpuahchahna a ni ang.