Ter Stegen-a'n Girona lam a hawi

Barcelona captain Marc André ter Stegen-a'n Catalan club-ah khelhna hmun a chan loh avangin loan hmangin Girona a pan dawn. German keeper Ter Stegen tan FIFA World Cup-a ram tana khelhna hmun chan theih nan khelhna hmun chan tam a mamawh.

Ter Stegen hi Barca-in Girona pan turin phalna an pe tawh a, an inremnaah hian lei theihna a tel dawn lo a, tun season khelh hmabak atan chauh a ni ang.

Kum 33 mi Ter Stegen hi hnunzâng leh khup hliam vangin hun rei tak a chawl a, a awm loh chhungin Espanyol aṭanga Barca zawmtu Joan García-a'n khelhna hmun a insawhnghet hman.

German national team lama thuneituten Ter Stegen-a'n Manuel Neuer kalsan no. 1 a chang dawn a nih chuan khelh tam a mamawh tih an sawi chiang tawh a, German keeper hian World Cup khelh a tum a nih chuan loan hmanga chhuah hi a ṭul a ni.

Tun season-ah Ter Stegen hi match khatah chauh a la inlan a, German manager Hansi Flick hnuaiah third choice keeper a ni mek. Barca captain ai hian Flick-a'n Joan García leh Wojciech Szczęsny te a la ring zawk.