AO-ah Sinner tan hattrick?

Nimin khan Australian Open mipa singles-ah champion lai Jannik Sinner chuan Hugo Gaston a hmachhawn a, Gaston hi a inhliam vangin khelh zawh a ni lo. Chutihrualin Sinner hian 6-2, 6-1 in hma a hruai tawh a, khel zo thei pawh ni se champion lai hi a chak ngei tura ngaih a ni.

Sinner hian AO inelna hnuhnung pahnihah nomawi a chawi a, kumina nomawi a chawi leh thei a nih chuan hattrick a siam dawn. First round chak zawhah Sinner chuan,"Second set aṭang kha chuan a service a na tawk lo a, hliam a nei tih a hriat theih. Hetianga chak hi chu ka duh dan a ni lo," tiin a khingpui hliam vanga an khel zo thei lo chu pawi a ti hle.

Seeded no 2 Sinner hian second round-ah qualifier patlang Dane Sweeny a hmachhawn dawn a, khawtual tlangval hian first round-ah Gael Monfils a hneh. Sinner hi a chak chho zel a nih chuan semifinal-ah Novak Djokovic nen an inhmachhawn thei dawn.

Chutihrualin Sinner elpui ber tur erawh seeded no. 1 Carlos Alcaraz a ni thei ang. World no. 1 Alcaraz hian Pathianni khan wild card hmanga tel Adam Walton chu 6–3, 7–6(2), 6–2 in an hneh.

Thla liam ta khan Alcaraz hi a mentor Juan Carlos Ferrero nen an inṭhen a, tun hi inelna liana Ferrero tel loa a khelh vawi khatna a ni. Kum 22 mi Alcaraz hian tukin zing hian German tennis player Yannick Hanfmann a hmachhawn ang.