Manchester City tlarhnung tihchak nan Guehi

Manchester City-in Thawhṭanni zan khan Crystal Palace aṭanga Marc Guehi an lakluh thu an puang a, Guehi hi pound maktaduai 20 man a ni. England defender hian nipui bazar khan Liverpool a zawm hman ṭep a, Europe club lian ṭhahnem takin an sawmna karah Pep Guardiola hnuaia khelh a thlang.

Kum 25 mi Guehi hi season tawp ruala a contract a zawh dawn avangin Palace-in manto takin an hralh thei tawh lo a, chutihrualin thla ruk lek contract a nei tawh chunga £20mtd laia an hralh theih hian a theihna neih sanzia a ang.

English defender hian City nen inremna neih hnuin Pathianni khan medical a tifel a, kum nga leh a chanve contract a ziak. Chelsea academy chhuak Guehi hian Swansea aṭangin Crystal Palace hi kum 2021 khan a zawm a, Eagles tan match 188 khel tawhin tun season-ah ringawt match 33 a khel tawh a ni.

January transfer-ah City-in player pahnih an lakluhna chiah a ni a, January 9 khan Bournemouth aṭangin £62.5mtd-in Antoine Semenyo an lalut tawh bawk. City-in Premier League-a season chanve hmang ṭha pahnih an lalut a, thlasik bazara sum an sen tam avangin champion theihna kawng a inhawng zau sawt ang.

City thlangtu Guehi

City defender thar Guehi chuan, "Man City player ka ni thei hi ka lawm takzet a, ka inchhuang bawk. Ka football career-a rim taka ka thawhrimna rah ka sengah ka ngai. England-a club ṭha ber ka zawm a, player ṭha rual zinga ka tel ve hi awih a har zawk. Hetiang ka sawi thei ta mai hi nuam ka ti," tiin Pep Guardiola hnuaia khelh a châkzia uar takin a sawi.

Tun thla tir khan City defender pawimawh pahnih Josko Gvardiol leh Ruben Dias te an inhliam a, Pep-a'n tlarhnungah player thlan tur a nei tlem. Manchester United laka an mualpho ṭumah pawh Nathan Ake bula ding turin kum 21 leh a hnuai lam pathum Rico Lewis, Abdukodir Khusanov leh Max Alleyne te an awm. Halftime-a Alleyne thlaktu Nico O'Reilly pawh kum 20 mi chauh a ni.

City hi an hmelma United lakah 2-0 in an tlawm a, Premier League hmahruaitu Arsenal nena an inkar a zauh phah bawk. Guehi hian duh thlan thei tur club ṭhahnem tak nei mah se Etihad Stadium pan a thlang a, City-in an mamawh em em bawk.

Tu nge Guehi?

Season liam ta aṭanga thlirin Guehi hi statistics-ah pawh Premeir League-a centre back record nei ṭha top 10-ah a tel. Tehfung hrang hrang clean sheet, lei leh boruaka ball inchuhnaa hnehnaa chang zawk bakah ball nena khingpuite tlarhma paltlang kawngah a ti ṭha 10 zingah a tel pha vek.

Tun season bikah pawh khingpuite ball in pass tur lo dan sak, khingpuite aṭanga ball lak let leh ball inchuh hnehah a ti ṭha 10-ah a tel. Guehi captain-na hnuaiah May thla khan Palace-in FA Cup-ah nomawi an chawi a, Euro 2024-a England-in final an thlen theihna kawngah player pawimawh a ni pha.

English defender hi a sulhnu leh a theihna thlirin Man City tlarhnungah pawh tlangnel takin a khel thei dawn. Manchester derby-ah United-in City tlarhnung hun thawl an pe a; John Stones, Gvardiol leh Dias te an awm loh avangin an hmang ṭankgai thei lo.

Guehi erawhin ball a keng ngam dawn a, hei hian tlarhnung chauh ni loin tlarhma lam a pui thei ang. Palace-ah Guehi hian minute 90 chhungin long ball vawi 7.3 pet ang a ni a, 45.7% a pass dik. Hei chauh hi a ni lo a, centre back-ah ding leh veiah a awm thei ve ve. Defender pathum an hmang a nih pawhin position pathumah a awm thei vek bawk.

Pep-a'n player pakhat chauh a la lut a, mah se Guehi hi defence laiah chhawr theihna a tam avangin duh thlan tur a ngah sawt dawn. Man City hian nizan khan Bodo/Glimt an hmachhawn a, January 24, Inrinni zanah Wolves nen an inkhel dawn. Pep-a hote hi chak hmel hmu chho leh turin an fixtures pawh a ṭha.