A vawi 100 nan Djokovic a chak

Novak Djokovic zet zawng a ropui e - mi tam takin khawvela tennis player ropui ber ang hiala an chhal hian Australian Open-ah chakin bul a ṭan a, kum 38 mi hian Pedro Martinez chu straight set-in a hneh.

Australian Open-ah ringawt pawh vawi 10 champion thei Djokovic hian 6-3 6-2 6-2 in hnehna a chang a, Australian Open-ah hian vawi 100 ngawt a khingpuite a hneh tawh - a ropui thlawt.

Djokovic hian grand slam title vawi 24 ngawt la tawhin, tennis player zinga grand slam la hnem ber record a chelh mek - Australian Open nomawi hmangin 25-ah kaisan a tum dawn tih a chiang.

Serbian star hian Australian Open (10) bakah French Open (3), Wimbledon (7) leh US Open (4) a la tawh a, fak loh rual a ni lo.

Djokovic a lawm

World number 4 Djokovic-a'n Pedro a hnehna kawngah vawi 57 serve neiin, vawi nga chiah point a hloh - a khelh danah amah ngei pawh a lawm a, sawisel tur a neih loh thu a sawi.

Serbian tennis star chuan, "Zanin ka khelh dan chu a ṭha thlawt a, sawisel tur ka nei lo. Ka serve pawh a ṭha tawkin ka hria.

"A ṭha thei ang bera tournament bul ṭan hi a pawimawh a, hei hi mahni inrintawkna piahlamah kan khingpui turte an lo hlauhthawnna atan a ṭha a ni," a ti!

Djokovic chuan sawi zawmin, "Match ka khelh leh hmain hahdamna hun ni engemaw zat ka la nei dawn a, ka hmachhawn leh tur tan nasa taka inbuatsaihn nan ka hmang ang," a ti a, second round-ah inpeih ata inlan a tum.

Nakinah aw!

Australian Open champion ngun ber record chelhtu Djokovic hian AO hma hian Wimbledon (102) leh Roland Garros (101) ah te vawi 100 hnehna a lo chang tling tawh bawk a, a inkhelh zawhah hian Australian Open-a a match hmasa ber chu interview pahin an thlirtir.

Mahse, Djokovic chuan, "Vawi 100 hnehna chan theih chu a nuam a, thawnthu thar ziah tumin ni tin ka hmanhlel ṭhin," a ti a, tennis khawvela a sulhnu erawh a chawlh hunah hahdam taka thlirlet a duh zawk thu a sawi bawk.

Djokovic chuan, "Tun hnai kum nga/kum 10 chhung khan, history ka siam thei tih hriain ka bei nasa lehzual hle. Ka taksa uluk taka enkawl a, ka daih rei theihna tura min puitu tam tak ka tawng a, ka vannei hle.

"Tun thlenga hetiang level-a ka khel thei hi ka lawm a, hnehna ka chang leh ta hi duhthusam thleng dik a ni e," a ti a, second round-ah world no. 137 Francesco Maestrelli nen an inkhel leh ang.

Result dang

Australia mipui beiseina, an ram tlangval Alex de Minaur chuan Mackenzie McDonald chu 6-2 6-2 6-2 a hnehin second round a lut ve bawk a, kum 1976-a Mark Edmondson hnua Australian mi, Australian Open-a champion hmasa ber nih tumin kawng dik a zawh zel.

Seeded no 6-na Alex chuan, "He inelnaah hian a tikimtu mai ni tura tel ka ni lo a, hnehna chang tura tel ka ni. Nomawi chawi thei zinga tel ka duh a, ka tum ber pawh a ni. Zanin result-ah hian ka duhtawk mai dawn lo," a ti.

Kum 28 mi Andrey Rublev chuan Italian mi Matteo Arnaldi chu straight set-a hnehin, second round a lut bawk a, vawi thum zet Grand Slam final lut tawh Casper Ruud chuan Mattia Bellucci a hneh bawk.

Hetihlai hian seeded 17-na ni phak Jiri Lehecka erawh rin loh takin a tlawm a, kum 21 mi, world no. 198 Arthur Gea lakah a tlawm - Gea hian second round-ah Stan Wawrinka a tum zui dawn.