Juventus khingpui tur Mourinho 'Benfica'

Champions League-ah zanin dar 1:30 hian Juventus chuan Jose Mourinho enkawl Benfica club an mikhual dawn. Turin club hian point kua hmuin 17-naah an awm mek a, a sang pariat zinga tel theihna kawng a inhawng zau. Mourinho enkawl Benfica erawh point ruk hmuin 24-naah an awm a, match hnih khelh tur la awmah a sang pariat zinga an tel theih a rinawm tawh loh.

Tun season UCL group stage-ah Juventus an che ṭha tawk lo a, vawi hnih chiah chakin an khingpuite vawi thum an inhnehtawkpui tawh a, vawi khat an tlawm tawh bawk.

Turin club hian Serie A an khelh hnuhnung berah Cagliari an hneh lo a, Champions League lamah chet sual nawn an duh dawn lo a, chak ngei tumin Allianz Stadium-ah Benfica an lo mikhual ang.

Juventus hian malpui hliam vangin Dusan Vlahovic a la khel thei dawn lo a, Vlahovic awm lo mah se Canadian forward Jonathan David bakah tun hnaia che ṭha tak Weston McKennie leh Kenan Yildiz an awm avangin hlauhthawnna tur a awm lo thung.

Benfica tan Nicolas Otamendi chu innghahna a la ni dawn a, Man City defender hlui hi a kum 37 mi ni tawh mah se a la rintlak. Portuguese club hi coach lar Jose Mourinho-a'n a enkawl avangin Juve tan zuam sual theih an ni.