Chelsea mikhual tur Pafos FC

Coach thar hnuaia khel Chelsea chuan zanin dar 1:30 hian Cyprus club Pafos FC an mikhual dawn a, coach thar Liam Rosenior hnuaia Champions League match an khelh hmasak ber tur a ni.

Rosenior-a naute hi Champions League khelh mekah point 10 hmuin table-ah 13-naah an awm a, playoff khelh ngai lo turin a sang pariat zinga tel an inbeisei. An mikhual tur Pafos erawh point ruk hmuin 26-naah an awm a, playoff khelh an la inbeisei ve mek bawk.

Pafos tan Chelsea defender hlui David Luiz a khelh a rinawm a, tlarhma lamah Croatian forward Mislav Orsic a awm dawn bawk avangin zuam sual theih an ni.

Blues tan tun seaon Champions League-a goal thum khung tawh Estevao a khelh dawn leh dawn loh a chiang lo a, Brazilian forward Estevao hi inkhel turin a la in fit tawk lo niin media ṭhenkhat chuan an sawi. Estevao bakah hian an thiampuipa Cole Palmer leh full back Malo Gusto te dinhmun a la chiang lo bawk.

Chelsea tan tlarhma lamah Alejandro Garnacho leh Joao Pedro te khelh ṭhat lai a ni a, Liam Delap a dam tawh bakah Pedro Neto, Enzo Fernandez leh Moises Caicedo ten tlarhma an la thlawp thei bawk. Coach thar Rosenior-a'n duhthlan tur a ngah a, Pafos hneh turin an ṭha tawk.