Vini-a'n Real chhuahsan a hreh lo

Real Madrid forward Vinicius Junior chuan Santiago Bernabeu chhuahsan a hreh lo niin khawthlang media-te chuan an tarlang a, an match hnuhnung bera Real antuten an au el leh tak avangin a hne ve tawh niin an sawi!

Ballon d'Or a dawn loh ṭum pawha Real Madrid chhungkua tawpin an tihtauh pui khawpa an duat, Brazilian forward Vini hian Real-ah hian tun season bak season khat dang chauh contract a nei tawh.

Real hian contract thar ziak turin dawr mah se, a hlawh chungchangah an inrem thei lo a, coach ban tak Xabi Alonso hma hun chian hma kha chu contract thar ziah a duh lo nia sawi a ni bawk.

Hetiang boruak karah hian Vini-a'n khelmualah beisei a phak lo ve tho bawk. Mahse, kar hmasa lawkah Alonso ban a ni a, Spanish coach ber ban a nih takah chuan contract thar pawh ziak mai tura ngaihna a lian hman hle.

Mahse, Levante nena an inkhelah Vini hi auh nawmnah a ni a, kum 25 mi forward hian a ṭhiante bulah, "Club ṭantuten min duh lohna hmuna khelh reng hi ka tum lo," tiin a sawi niin Spanish media-te chuan an tarlang.

Levante nena an inkhelah khan Vini chauh ni loin Real player ṭhenkhat pawh auh nawmnah an ni a, Jude Bellingham leh Federico Valverde te pawh auh nawmnah zingah an tel - club president Florentino Perez meuh pawh a bang chuang lo!

Perez phei hi chu a hna aanga chawl turin an au el hial. Hetihrual hian Vini-a'n ball a chan apiangin auh nawmnahna thawm a ring leh zual a, Levante laka fan-ten an au el kha match thum chhung a zawna Vini bikin auh el a tawhna a ni.

Hetiang boruak avang hian Vini hian Real-a cham chhunzawm a châk lo niin a lang a, duhtu a vai dawn lo bawk. Saudi Arabia lam chuan khawvela footballer hlawh hnem ber pawl ni tura lakluh an duh reng a, Manchester City leh Chelsea hming lam rik a ni bawk.

Season li zet a zawna goal 20 tal khung ziah Vini hian tun season-ah beisei a phak lo ve bawk a, inelna hrang hrangah match 29 khel tawhin goal ruk a khung a, assist vawi riat a nei.

Real tana a khelh chhiat piahlamah coach ban tak Xabi Alonso duh lotu langsar zinga a telna chu Real fan-ten an auh nawmnah chhan niin a lang a, contract thar ziah aia chhuah a thlang a nih pawhin a mak lo ang.

Madrid khaw club hian Spanish Super Cup final-a Barcelona an ngam loh hnuah Alonso an ban a, a thlaktu Alvaro Arbeloa hoin Copa del Rey round of 16 an khel a, Spanish second division club Albacete-in an pet chhuak.

Mahse, Levante lakah 2-0 a chakin, an hmai bal lutuk tur league result hmangin an phih fai a, nizan dar 1:30 khan Champions League-ah AS Monaco nen inkhelin, an result kan hre hman lo.