Slavia Prague mikhual tur Barcelona

Champions League group match khelh mekah Barcelona chuan zanin dar 1:30-ah Slavia Prague luhchhuah tumin Czech Republic an pan dawn. Hansi Flick-a enkawl Barca hian a sang pariat zinga tel an tum a, league match hnuhnung berah Real Sociedad an hneh loh bawk avangin an thinrim hrikthlak nan an mikhualna ramah chak ngei an tum ang.

Barca hi Champions League table-ah 15-naah awmin point 10 an hmu tawh a, pariatnaa awm Liverpool chu point hnihin an phak lo. An hmachhawn tur Slavia Prague erawh 33-naah awmin playoff an khelh phak a rinawm tawh loh.

Lamine Yamal chu hrem vangin a inlan thei dawn lo a, Champions League match hnuhnung bera Frankfurt an hmachhawn ṭuma yellow card a chawi avangin Yamal hi hrem a ni. Yamal bakah hian Gavi leh Andreas Christensen te chu inlan lo tur chiang sa an ni a, Raphinha inhmun a chiang lo bawk. Raphinha hi a malpui hliam avangin Pathiannia Real Sociedad an hneh loh ṭum pawhin a inlan tawh lo.

Turin club tan Yamal leh Raphinha awm lo mah se Man-chester United aanga an hawh Marcus Rashford a awm dawn a, English forward Rashford hian tun season Champions League-ah goal li a khung tawh. Rashford thawp turin Spanish duo Fermin Lopez leh Ferran Torres an awm dawn a, anni bakah hian veteran striker Robert Lewandowski a awm dawn bawk avangin Slavia Prague hneh ngei an tum ang.