AO hmeichhe singles-ah seeded no. 10 chin la dam

Australian Open hmeichhe singles first round chu nimin khan khelh zawh a ni a, vawiin aṭangin second round khelh ṭan a ni ang. Nimin khan champion lai Madison Keys bakah seeded no. 5 Elena Rybakina leh seeded no. 10 Belinda Bencic ten hnehna an chang. Vawiin hian champion rinkai Aryna Sabalenka a inlan dawn.

Champion lai Keys

Australian Open champion lai Madison Keys hian nimin khan Oleksandra Oliynykova chu 7-6 (8-6), 6-1 in an hneh. Seeded no. 9 Keys hian awlsam takin first round a paltlang lo.

Set hmasa berah 0-4 in an hnufual a, tie breaker-ah pawh 0-4 in hnufual leh mah se 7-6 (8-6) in set hmasa ber a la. First set-ah hian Oliynykova-i'n set point vawi hnih nei hman mah se Keys a tal chhuak ve ve a, set hnihnaah erawh harsatna nei loin 6-1 in hnehna a chang. American nula Keys hian second round-ah a hnampui Ashlyn Krueger a hmachhawn dawn.

No. 1 Sabalenka

Seeded no. 1 Aryna Sabalenka-i'n bul a ṭan ṭha a, first round-ah Tiantsoa Rakotomanga Rajaonah chu 6-4, 6-1 in an hneh. Sabalenka inkhel hi tennis legend Roger Federer leh Rod Laver ten a hmunah an thlir.

Sabalenka hian tukin zing dar 6:00 hian Rod Laver Arena-ah Chinese nula Bai Zhuoxuan a hmachhawn dawn. Belarusian nula hian inelna hnuhnung pathumah final a lut vek a, vawi hnih nomawi chawiin nikum khan final-ah Keys a hneh lo. Kumin hian Keys leh Sabalenka te hi an chak chho zel a nih chuan final-ah an inhmachhawn thei ang.

Engtin zel?

AO-ah hian seeded nei pha 32 an awm a, a sang 10-a tel pha Aryna Sabalenka (1), Iga Świątek (2), Coco Gauff (3), Amanda Anisimova (4), Elena Rybakina (5), Jessica Pegula (6), Jasmine Paolini (7), Mirra Andreeva (8), Madison Keys (9) leh Belinda Bencic (10) ten second round an lut vek.

Seeded nei pha zingah Ekaterina Alexandrova (11), Emma Navarro (15), Marta Kostyuk (20), Leylah Fernandez (22), Dayana Yastremska (26), Sofia Kenin (27) leh Maya Joint (30) ten first round an paltlang zo lo. Seeded no. 32 Markéta Vondroušová chu hliam vangin an inhnuk dawk bawk.

Vawiin hian Sabalenka bakah seeded no. 3 Gauf te an inlan dawn a, American nula hian Olga Danilović a hmachhawn dawn. Seeded no. 7 Jasmine Paolini pawhin Magdalena Frech a hmachhawn ang.

Russian nula ṭan hlawh Mirra Andreeva pawhin Maria Sakkari a hmachhawn ang. Australian Open hi Sony Network hmangin an en theih a, online-ah chuan SonyLiv hmangin a en theih ang.