Bournemouth-in midfielder thar an nei

Premier League club Bournemouth chuan Hungary midfielder Alex Toth chu pound maktaduai 10.4-in Ferencvaros aṭangin an lei a, kum nga leh a chanve chhung atan contract an ziahpui.

Hungarian club leh Cherries inrem danah chuan £10.4mtd hi sum hmahruai ang chauh a ni a, a khelh ṭhat dan a zira pek belh tur hi £2.6mtd niin, Cherries hian an hralh leh a nih chuan Ferencvaros hian a hralhna aṭangin 10% an chang ve leh bawk ang.

Hungary tana vawi kua inlan tawh Toth hi Benfica, Galatasaray leh Lazio te pawhin lakluh tumin an hel a, mahse, kum 21 mi midfielder hian khawvela league ngaihven hlawh Premier League lama kal a thlang ta zawk.

December 2024-a Ferencvaros tana inlan ṭan ve chiah Toth chuan, "Bournemouth hi Premier League-a club ṭha tak an ni a, min duh a ni tih ka hriat khan ka lawmin ka phur hle.

"He club kalphung leh a inrelbawl dante hi ṭha ka ti em em a ni," tiin European club langsar dang hnar a, Bournemouth pan a thlan chhan a sawi.

Toth hian tun season inelna hrang hrangah match 25 khelin goal hnih a khung tawh a, assist vawi nga a nei tel bawk. Bournemouth head of football operations Tiago Pinto chuan, "Hungary-a club ṭha ber pawl, Europe thlenga inlan club aṭangin Toth hi kan la lut a ni.

"Hei vang ringawt pawh hian ani kan la lut thei hi kan lawm a, coach Andoni Iraola kaihhruaina hnuaiah hma a sawn kan beisei," a ti.

Cherries hian tun thlasik transfer-ah free agent, goalkeeper Fraser Forster chu thla ruk chhung atan an la lut tawh a, Ligue 1 club FC Lorient aṭangin full back Ade Solanke an la bawk.