Champions League Season hmang ṭha Bayern

Bayern Munich-in Bundesliga-ah harsatna nei loin nomawi an humhim dawn niin a lang tawh a, Champions League lamah pawh last 16 lut turin an dinhmun a ṭha viau bawk. Bavarians hian zanin dar 1:30 hian Allianz Arena-ah Union Saint-Gilloise an hmachhawn dawn a, point khat an hmu a nih chuan last 16 an lut ang.

Vincent Kompany hote hian Bundesliga-ah goal 71 an khung tawh a, an hnuaia awm Borussia Dortmund aiin a letin an khung tam zawk. Champions League lamah pawh goal 18 khung tawhin match ruk khelh tawhah hmahruaitu Arsenal aiin goal khatin an khung tam.

Bayern hian Harry Kane bakah Michael Olise leh ralthawr duhawm Lennart Karl te an nei a, player talent nei ṭha bik Jamal Musiala a dam ṭhat tawh bawk avangin zaninah pawh Kompany hote hi goal khung ngei tura beisei an ni.