No. 1 Sabalenka tan harsa a awm lo

Australian Open 2026-ah world number 1 Aryna Sabalenka chuan nimin khan Bai Zhuoxuan chu straight set (6-3, 6-1) a hnehin third round a lut. Rod Laver Arena-a inkhelah hian Sabalenka a chungnun avangin darkar khat leh minute 25 chhung chauh khelh a ni.

Set hmasa ber aṭangin Sabalenka-i'n na takin a nawr nghal a, 3-0 ni nghal mah se Chinese nula Bai a ṭang thei hle. World number 1 danglamna a lang a, Sabalenka-i'n set hmasa ber 6-3 in a la. Set hnihnaah Belarusian nulain a theihna tak a rawn lantir ta a, 'serve and volley' tactic rawn hmangin a hlawhtling.

Seeded no. 1 Sabalenka hian first serve tihdik 72% a nei a, a serve hi a nat bawk avangin Bai tan a harsa. Third round-ah Sabalenka hian seeded no. 28 Emma Raducanu hnehtu Anastasia Potapova a hmachhawn dawn. Nimin khan Radacanu hian Anastasia Potapova hi 7-6(7-3), 6-2 in an hneh lo.

British no. 1 Radacanu hian first round-ah Thailand player Mananchaya Sawangkaew chu straight set (6-4, 6-1) in a hneh a, niminah pawh first set-ah 5-3 in hma hruai hman mah se a inlehthaltir. Radacanu hian kum 2021 khan US Open a champion avangin khawvelin a hmelhriat a, kum 2024 leh 2025-ah hliamin a tihbuai avangin beisei ang result a nei thei tawh lo.

Sabalenka khingpui tur Potapova hi kum 24 mi a ni a, WTA singles titles pathum a la tawh. Russia rama khaw pakhat Saratov-a piang ni mah se nikum December thla khan Austria khua leh tui nihna a nei a, Austria hmingin a khel tawh.

Tunah hian Potapova hi world no. 54 a ni mek a, a thlen san lai berin world no. 21 a ni pha. Chutihrualin world no. 1 ni lai Sabalenka a hmachhawn dawn a, Radacanu hnehtu Potapova tan hna hautak a ni ang.