Rodri telna Man City an chak lo

Manchester City-in beisei an pha lo zel a, Manchester Derby-a an mualpho hnuah Bodo/Glimt lakah 3-1 in an tlawm. Norway-a inkhelah Bodo/Glimt-in Kasper Hogh-a goal hnih leh Jens Petter Hauge te hmangin goal thum an khung hmasa a, City-in Rayan Cherki hmangin siphurh sut ṭhen mah se goal dang an khung thei tawh lo.

City chhuanvawr Rodri pawhin inkhel bul a ṭan a, a ṭha lo zawngin danglamna a thlen. Thawhlehni zan inkhelah hian Spanish midfielder hi minute 62-naah hnawhchhuah a ni a, player 10-a khel City tan thawhchhuah a harsat phah sawt. Bodo/Glimt tan erawh result duhawm bik a ni a, City an hneh ringawt lo a, tun season UCL-a an vawi khat chakna a ni.

Alleyne tawpna?

Man City-in Ruben Dias, John Stones leh Josko Gvardiol te hliam vangin loan hmanga Watford-a kal Max Alleyne an ko let a, Pep-a hnuiah English rawlthar hian defence laiah hmuh pawimawh a chang. Manchester Derby-ah Alleyne hi an thlak hma a, UCL-ah bul ṭan mah se beisei a pha chuang lo.

Minute 22-naah Kasper Hogh-a'n a tauh lut a, mual laia Alleyne tihsual vanga lutah a ngaih theih. Norwegian club hian minute hnih hnuah Hogh hmangin goal an khung lehnghal a, Alleyne tihsual a ni. Kum 20 mi Alleyne hian UCL match hmasa berah ṭum hnih a tihsual vangin City-in goal hnih an chhuah.

City-in bench-ah Nathan Ake te kawl mah se Pep-a'n Alleyne hi a khelh tluantir a, chutihrualin Crystal Palace captain Marc Guehi an lakluh avangin English defender tan khelhna hmun chan a harsa tawh ang.

Goal leh red card

Bodo/Glimt-in an nawr chhunzawm a, chance pawh an ngah zawk. Offside vangin mual neitu lam goal khung pawm a ni lo a, mah se minute 58-naah Jens Petter Hauge-a'n goal ropui a khung. Hauge-a'n thui tak a khalh a ni ringawt lo a, a finishing a ṭha. Tun season-ah Hauge hian UCL-ah goal li a khung tawh a, club lian zawk pawhin an en zui ngei a rinawm.

City theihna a rawn lang zui a, Nico O'Reilly-a'n box pawnah a thiam thil a lantir hnuah Cherki-a'n kawh zetin goal kilah minute 60-naah a khung. Pep-a hote phur hman viau mah se ṭul lo zetin City captain Rodri-a'n second 53 chhung lekah yellow card vawi hnih a hmu a, English club an insiamṭha thei ta lo.

Bodo/Glimt-in an tam zawk tih hriain an nawr zui a, offside vangin Kasper Hogh-a goal khung pawm a ni lo. City-in goal thum an chhuah a, offside vanga goal pawm loh goal hnih a awm bawk avangin derby hnuah Pep leh a hote an la insiamṭha lo.

Tlarhma lam pawh

Man City tan Erling Haaland-a'n goal khung a harsat a, Norwegian striker hian match li chhung goal a khung tawh loh avangin Pep-a hoten beisei an phak loh phah. Haaland hian January 7, 2026 khan Brighton lakah penalty aṭangin a khung a, open play-ah phei chuan match riat chhung goal a khung tawh lo.

An ram club lakah hian Haaland-a'n goal zawnah pawh a pet lo a, Man United lakah goal an mamawh chungin an thlak hma a, Newcastle United lakah a goal khung VAR vangin pawm a ni lo a, Palace nen an inkhelh ṭumin City zawm ta Guehi-a'n a awm chilh avangin a che thei lo.

Chutihrualin City hian chhawr loin bench-ah Jérémy Doku an dah a, player thar Antoine Semenyo pawh an hruai tel lo. Inkhelhna Aspmyra Stadion hi artificial turf a nih avangin City tan a harsa dawn a, khaw vawt lam hi -2°C a nih avangin khelh a harsa dawn.

Man City hian last 16 lut turin match hnuhnung berah Galatasaray an hneh ngei a ṭul dawn a, Etihad Stadium-ah an chak a nih pawhin inkhel result dang a zirin last 16 an luh lo thei bawk. Premier League lama an elpui Arsenal-in February thlaah UCL match an nei dawn lo a, anni erawh match hnih nei thei dinhmunah an ding.

Pep-a hote hian January 24, Inrinni zan hian Wolves an mikhual dawn a, Premier League-ah an insiamṭha thei lo a nih chuan ban la tawk lo ngai lo Pep Guardiola meuh pawhin pressure a nei ṭan ang.