Real Madrid an tal hiar!

Xabi Alonso ban hnua an Champions League match hmasa berah Real Madrid an insum lo - goal ruk ngawt an khung a, Thawhlehni zan khan mikhual AS Monaco chu 6-1 in an sawp.

Real tan Monaco aṭanga hming chher Kylian Mbappe chuan goal hnih a khung a, Franco Mastantuono, Vinícius Júnior leh Jude Bellingham ten goal khat ṭheuh an khung bawk.

Madrid khaw club-in goal khungpui mamawh lo mah se, Thilo Kehrer chuan an lamah a tilut a, minute 72-naa Jordan Teze-a'n Monaco goal awmchhun a khung chu mualpho zualpui khuhna bak a tling zo lo.

Real-in coach Alonso an ban hnuah, Monaco an hmachhawn hma hian match hnih an khel hman a, Copa del Rey round of 16 aṭangin an tla fel der - coach thar Alvaro Arbeloa hoin second division club Albacete chu 3-2 in an ngam lo.

La Liga-ah 2-0 in Levante hneh zui mah se, fan-ten an team an au el nasa a, a bik takin Alonso chhuah nana tha thawhtu anga sawi Vinicius, Bellingham leh Federico Valverde ten tihelna an tawk nasa.

Club president Florentino Perez meuh pawh zuah a ni lo a, "I hna aṭangin bang rawh," an ti! Vini phei chuan, "Min duh lotute kianga awm reng a ṭul lo," tiin chhuah a tum niin an sawi hial.

Thawhlehni zana an inkhelh hmain Mbappe-a'n fan-te chu team au el tawh lo turin a ngen a, Santiago Bernabeu-ah goal hnih a khung zui - Real hi an chak zel chuan an auh el chhunzawm lo ang tih a chiang!

Minute ngana lekah Mbappe hian goal hmahruai a khung a, minute 26-naah Vinícius siamsak aṭangin an goal hnihna a khung zui - he goal luh theihna tura Real player-te che vel chu hmuhnawm a tling.

Real-in goal dang khung loin chawlhlawk an hmang a, second half-ah goal khung an uar lehzual. Minute 51-naah Mastantuono inlarin, Champions League-a a goal hmasa ber a khung - hei pawh Vini-a assist bawk a ni.

Vinicius a phur laklawh - minute 55-naah an goal lina thawk chhuak lehin, a cross aṭanga ball kal chu Thilo Kehrer chuan an lamah a tilut a, 4-0 a ni der.

Hetah hian a la tawp lo cheu. Minute 63-na a ni a, assist vawi hnih nei tawh Vini-a'n a khung ve leh a, 5-0 a ni! Monaco tan Teze-a'n si phurh sut ṭhen ve leh mah se, goal nga an chhuah tawh avangin beiseina a awm tawh lo.

Minute 80-naah Bellingham inlarin, Monaco keeper Philipp Kohn a tlan hel a, duhthusamin a hmawr a bawk - Real-in 6-1 in hnehna an chang a, Champions League match sarih an khelhah vawi nga an chakna chiah niin, table-ah pahnihna an ni.

Madrid khaw club tan kar duhawm a ni - UCL-ah chiang taka an chak piahlamah, Pathianni zan khan La Liga-ah Barcelona an tlawm a, Catalan club hi point khat chiahin an phak tawh lo.

Inrinni zanah Villarreal lenchilhin, La Liga an khel zui leh ang a, January 28, Nilaini zanah Benfica lenchilh lehin, an chak chuan playoff khelh ngai loin last 16 an lut chiang ang.