Thomas Frank dinhmun ziaawm hret

Tottenham Hotspur chuan Thawhlehni zan khan Champions League-ah Borussia Dortmund chu 2-0 in an hneh a, Spurs tan Cristian Romero leh Dominic Solanke ten goal an khung. Tottenham hi chak avangin manager Thomas Frank-a dinhmun a ziaawm hret mah se ban theih dinhmunah a la ding reng. Khawthlang chanchinbu ṭhenkhatin Frank hi tun kar chhungin Spurs-in an ban dawn niin an ziak hial.

Tun season Premier League-ah Frank-a hoin Spurs-in beisei an pha lo a, table-ah 14-naah awmin point 10 chiahin relegation zone aṭanga himin match hnuhnung pangaah vawi khat chiah an chak. Spurs hian Inrinni zan khan relegation zone-a awm West Ham United chu 2-1 in an hneh lo a, inkhelh banah mipuiin an 'boo' bakah "Naktukah an ban dawn che" tiin Thomas Frank an au el hial a, Spurs ṭantute an manager lakah an lungawi tawh lo.

Danish coach hoin Premier League lamah beisei pha lo mah se Champions League-ah erawh an khel ṭha a, table-ah palinaah awmin knockout stage an lut tawhah a ngaih theih. Dortmund laka an chak zawhah pawh hian fans ṭhenkhatin Thomas Frank hi chhuak tura an duh thu an au chhuahpui tho.

Hetiang boruak karah hian Frank chuan, "Hnehna kan chan hian, chhan hrang hrang vangin minti lawm. Kan khelh ṭhat avangin ka lawm a, bul kan ṭha kan minti lawm. Goal hnih kan khung a, goal kan chhuah lo bawk. Point thum hmuh hi a hlu a, a sang pariat zinga awm ngei kan tum. Burnley-ah kan insawrbing leh phawt ang a, chumi zawhah Frankfurt lam kan thlir ang. Fan-te pawhin club tana theihtawp an chhuah avangin ka lawm," tiin a sawi a, ban mai tumna la nei loin hmathlir thui tak a la nei a ni.