Lakers chakna Doncic-a triple-double

NBA regular season kal mekah nimin zing khan Luka Doncic-a hoin Los Angeles Lakers-in Denver Nuggets 115-107 in an hneh a, Doncic hian triple-double neiin inkhel zingah a langsar hle.

Ball Arena, Denver-a inkhelah mikhual team Lakers an khel ṭha a, Luka Doncic chuan point 38, rebound 13 leh assist vawi 10 neiin triple-double a siam a, Marcus Smart chuan point 15 a neih bakah veteran player Lebron James-a'n point 19, rebound vawi kua leh assist vawi riat a nei ve bawk a, triple-double a siam ve teuh hle.

Lebron James hi a kum tam ve deuh tawh mah se American forward hi court chhunga a inlanin a langsar pawl a la ni thei ziah. James hi NBA-a a season hmasa ber hnuah a vawi khat nan All-Star starter atan thlan a ni lo thung.

Home team Denver Nuggets tan point guard Jamal Murray-a'n point 28 leh assist vawi 11 a nei a, Aaron Gordon leh Peyton Watson ten point 18 nei bawk mah se Lakers hneh nan a tawk zo lo. An thiampuipa Nikola Jokic tel loin Nuggets an danglam a, Jokic hi nikum December tawp lamah a khupah hliam tuarin tun thlengin a la inkhel thei lo. Serbian center Jokic hi February tir lamah a rawn let beisei a ni.